అందాల నటి అనుష్క ఓ వైపు హీరోయిన్ గా నటిస్తూ.. మరో వైపు టైటిల్ రోల్ సినిమాలు అంగీకరిస్తోంది. అరుంధతి, పంచాక్షరి, రుద్రమ దేవి తర్వాత భాగమతిగా అలరించడానికి సిద్ధమైంది. అలనాడు గోల్కొండను పాలించిన చక్రవర్తి ఖులీ ఖుతుబ్ షాకు ముద్దుల భార్యగా పేరొందిన భాగమతి జీవితం ఆధారంగా తెరకెక్కనున్నఈ సినిమాకి జి. అశోక్ (పిల్ల జమీందార్) దర్శకత్వం వహిస్తున్నారు. భారీ బడ్జె ట్ తో ‘యువి క్రియేషన్స్’ నిర్మిస్తోంది.
ఈ చిత్రం ద్వారా జాతీయ అవార్డు గ్రహీత, మలయాళీ నటుడు జయరామ్ ని తెలుగు తెరకి పరిచయం చేయనున్నారు. అనుష్కకి విలన్‌గా జయరామ్ నటించనున్నాడని వార్తలు వెలువడడంతో ఈ సినిమా పై అంచనాలు పెరిగిపోయాయి. ఇందులో కీలకమైన పాత్రలో యంగ్ రెబల్ స్టార్ ప్రభాస్ ని నటింప చేయాలని అనుకున్నారు. ఆ ప్రయత్నాలు విఫలమవడంతో ఆ అవకాశం ఆది పినిశెట్టికి దక్కింది. సరైనోడు చిత్రంలో ఆది విలనిజం నచ్చడంతో ఈ యువ హీరోకి చిత్రబృందం ఓటు వేసినట్లు తెలిసింది. ప్రీ ప్రొడక్షన్ పనులను పూర్తి చేసుకున్న ఈ సినిమా ఈ నెల 15 నుంచి సెట్స్ మీదకు వెళ్లనుంది.
