హీరోగా సుమన్ అనేక విజయాలను అందుకున్నారు. అన్నమయ్య సినిమాలో శ్రీ వెంకటేశ్వర స్వామిగా ఆకట్టుకున్నారు. శివాజీ చిత్రంలో విలన్ గాను మెప్పించారు. ఇలా 150 చిత్రాల్లో నాలుగు భాషల్లో విభిన్న పాత్రలు పోషించి ప్రజల గుండెల్లో ప్రత్యేక స్థానం సంపాదించుకున్న సుమన్ పరిశ్రమలోకి అడుగుపెట్టి 40 ఏళ్ళు పూర్తి అయ్యాయి. ఆ సందర్భంగా గుంటూరులో ఏర్పాటుచేసిన కార్యక్రంలో పాల్గొని అనేక విషయాలను పంచుకున్నారు. తన రాజకీయ ప్రవేశం గురించి, అలాగే జనసేన అధినేత పవన్ కల్యాణ్ గురించి మాట్లాడారు. “పవన్ కళ్యాణ్ ప్రసంగాలకు యువత బాగా కనెక్ట్‌ అవుతారు. ఆయన్ని ఆదర్శంగా తీసుకుంటారు.
అందుకే అతను సమాజానికి ఉపయోగపడే సరికొత్త ఆలోచనలతో ముందుకు రావాలి” అని సూచించారు. ఇంకా మాట్లాడుతూ “పవన్ ప్రస్తావిస్తున్న సమస్యల గురించి గతంలో ఇతర నేతలు ఎందుకు మాట్లాడలేదు? ఎందుకు ఆ సమస్యలను తీర్చలేదు? పవన్ రాజకీయ ప్రయాణం కుల, మతాలకు అతీతం. అయితే రాజకీయాల్లో పవన్ ఎలా రాణిస్తారు? అనే విషయాల గురించి మాత్రం నేను ప్రస్తావించలేను. ఎందుకంటే పవన్ భవిష్యత్తు ఎలా ఉండబోతోందో నాకు తెలీదు” అని వెల్లడించారు. తన అవసరం ఉందనిపిస్తే తప్పకుండా రాజకీయాల్లోకి వస్తానని సుమన్ చెప్పారు. జనసేన పార్టీలోనే సుమన్ చేరే అవకాశముందని కొంతమంది భావిస్తున్నారు.
