ఏ రంగంలోనైనా ఆరోగ్యకరమైన పోటీ ఉండడం మంచిది. తెలుగు చిత్ర పరిశ్రమలోని హీరోల మధ్య అటువంటి ఆరోగ్యకరమైన పోటీ ఉంది. రంగస్థలంలో చరణ్ నటనను ఎన్టీఆర్ మెచ్చుకొని ఈ విషయాన్నీ మరోమారు స్పష్టం చేశారు. అలాగే హీరోయిన్స్ మధ్య కూడా ఆరోగ్యకరమైన పోటీ ఉందని సమంత చాటిచెప్పింది. టాలీవుడ్, కోలీవుడ్ లోని టాప్ హీరోయిన్స్ లో ఒకరైన ఈమె నటించిన రంగస్థలం గతవారం రిలీజ్ అయి విశేష స్పందన అందుకుంటోంది. ఈ చిత్ర విజయాన్ని తన భర్త నాగచైతన్యతో కలిసి విదేశాల్లో ఎంజాయ్ చేస్తోంది. అలాగే అక్కడ నుంచే సోషల్ మీడియా వేదికపై సంతోషాన్ని ఫ్యాన్స్ తో పంచుకుంది. అంతేకాదు వారు అడిగిన ప్రశ్నలకు సమాధానమిచ్చింది.
తెలుగులో కానీ, తమిళంలో కానీ ఇటీవలి కాలంలో మిమ్మల్ని మెప్పించిన నటి ఎవరు ? అని ఓ అభిమాని అడిగిన ప్రశ్నకు ఆలస్యం చేయకుండా “సాయిపల్లవి” అని సమాధానం ఇచ్చింది. తనకి పోటీకి వస్తున్న వారిపై ఎంతోకొంత కోపంగా ఉండడం కామన్. కానీ సమంత తన స్థానానికి పోటీ ఇస్తున్న సాయి పల్లవి పేరు చెప్పడాన్ని అందరూ అభినందిస్తున్నారు. సాయి పల్లవి ఫిదా మూవీతో తెలుగువారి మనసుదోచుకుంది. అలాగే స్టార్ హీరోయిన్ సమంత మనసు గెలవడం విశేషం.
