ఒక హీరో రిజెక్ట్ చేసిన కథతో మరో హీరో సినిమా తెరకెక్కడం అనేది సినిమా ఇండస్ట్రీలో సర్వసాధారణంగా జరిగే విషయం. కానీ.. ఇప్పుడు మహేష్ బాబు రిజెక్ట్ చేసిన ఒక కథను బన్నీ ఒకే చేయడం చర్చనీయాంశం అయ్యింది. మహేష్ బాబు-సుకుమార్ కాంబినేషన్ లో తెరకెక్కాల్సిన సినిమా క్రియేటివ్ డిఫరెన్సస్ కారణంగా ఆగిపోయిన విషయం తెలిసిందే. జూన్ లో రెగ్యులర్ షూట్ కి వెళ్లాల్సిన ఈ చిత్రం కారణాంతరాల వలన మొదలవ్వకుండానే ఆగిపోయింది. అయితే.. సుకుమార్ ఎక్కువ లేట్ చేయకుండా ఇమ్మీడియట్ గా బన్నీతో సినిమా ఎనౌన్స్ చేయడం, ఆ చిత్రాన్ని మైత్రీ మూవీ మేకర్స్ నిర్మించడానికి ముందుకు రావడంతో.. “ఆర్య, ఆర్య 2” తర్వాత బన్నీ-సుక్కూల కాంబో సినిమా ఫిక్స్ అయినందుకు అల్లు అర్జున్ ఫ్యాన్స్ అందరూ ఫుల్ ఖుష్ అయ్యారు.
కట్ చేస్తే.. ఈ సినిమాకి సుకుమార్ కొత్త కథ రాయలేదని, మహేష్ బాబు రిజెక్ట్ చేసిన కథకే చిన్న చిన్న మార్పులు చేసి బన్నీతో ఒకే చేయించుకున్నాడని వినికిడి. గంధపు చెక్కల స్మగ్లింగ్ నేపధ్యంలో తెరకెక్కనున్న ఈ చిత్రం రెగ్యులర్ షూటింగ్ 2020లో మొదలవ్వనుంది. ఈలోపు సుకుమార్ తన నిర్మాణ సారధ్యంలో రూపొందనున్న సినిమాలకు కథ మరియు దర్శకత్వ సహకారం అందిస్తాడని తెలుస్తోంది. మరి మహేష్ రిజెక్ట్ చేసిన కథ అల్లు అర్జున్ కి అచ్చొస్తుందో లేదో చూడాలి.
