మరో రెండు రోజుల్లో అల్లు అర్జున్ సరికొత్త చిత్రం ‘నా పేరు సూర్య‘ విడుదలవుతోంది. ఈ సినిమా అనంతరం అల్లు అర్జున్ నెక్స్ట్ సినిమా ఎవరితోననే విషయంలో నిన్నమొన్నటివరకూ క్లారిటీ లేదు. అయితే.. తాజా సమాచారం ప్రకారం అల్లు అర్జున్ తన తదుపరి చిత్రాన్ని విక్రమ్ కుమార్ దర్శకత్వంలో చేయనున్నాడని తెలుస్తోంది. నిజానికి “24” తర్వాత విక్రమ్ కుమార్ దర్శకత్వంలో అల్లు అర్జున్ సినిమా తెరకెక్కాల్సి ఉంది. అయితే.. అప్పటికి అల్లు అర్జున్ తమిళ దర్శకుడు లింగుస్వామితో సినిమా కమిట్ అవ్వడం వలన అప్పట్లో ఈ ప్రొజెక్ట్ సెట్స్ కి వెళ్లలేదు.
అయితే.. “నా పేరు సూర్య” అనంతరం అల్లు అర్జున్ సినిమా ఎవరితోననేది ఇంకా ఫిక్స్ అవ్వకపోవడం, కొరటాల శివ పేరు వినిపిస్తున్నప్పటికీ.. కొరటాల ఇంకా కథ కానీ హీరోని కానీ ఫిక్స్ అవ్వకపోవడంతో, ఆల్రెడీ విక్రమ్ కుమార్ స్టోరీ-స్క్రీన్ ప్లేతో సహా రెడీగా ఉండడంతో.. విక్రమ్ కుమార్-అల్లు అర్జున్ ల చిత్రం త్వరలో సెట్స్ కు వెళ్ళడం ఖాయమని తెలుస్తోంది. ఈ చిత్రం అనంతరం కొరటాల శివ సినిమా ఉండొచ్చు.
