అతి తక్కువకాలంలోనే మాటల మాంత్రికుడు త్రివిక్రమ్, పవన్ కళ్యాణ్ క్రేజీ ప్రాజక్ట్ అజ్ఞాతవాసిలో ఛాన్స్ అందుకోగానే అను ఇమ్యానుయేల్ ని అందరూ అదృష్టవంతురాలు అన్నారు. ఇప్పుడు మాత్రం అయ్యో పాపం అంటున్నారు. ఎందుకంటే.. అజ్ఞాతవాసి సినిమా పూర్తి కాకముందే తమ సినిమాకి డేట్స్ ఇవ్వమని నిర్మాతలు అను వెంటపడ్డారు. అప్పుడే ఆమె అల్లు అర్జున్ “నా పేరు సూర్య నా ఇల్లు ఇండియా”, నాగ చైతన్య “శైలజారెడ్డి అల్లుడు” సినిమాలకు సైన్ చేసింది. అజ్ఞాతవాసి రిలీజ్ కాకముందు మరో రెండు సినిమాలు అను ఖాతాలో ఉండేవి. బోయపాటి శ్రీను, రామ్ చరణ్ కాంబో మూవీ, త్రివిక్రమ్, ఎన్టీఆర్ కలయికలో తెరకెక్కనున్న చిత్రాల్లో హీరోయిన్ గా అను ఇమ్యానుయేల్ ను అనుకున్నారు. సంతకాలు మాత్రమే బ్యాలెన్స్.
అజ్ఞాతవాసి ఫెయిల్ కావడంతో ఆ దెబ్బ అనుకు తగిలింది. చరణ్ సినిమాలో హీరోయిన్ గా అనుని తొలిగించి బాలీవుడ్ బ్యూటీ కైరా అద్వానీని తీసుకున్నారు. అలాగే వచ్చే నెల నుంచి రెగ్యులర్ షూటింగ్ జరుపుకోనున్న ఎన్టీఆర్ సినిమాలోను అను స్థానంలో మరో బ్యూటీ చేరింది. ఛలో సినిమా ద్వారా ఆకట్టుకున్న రష్మికను తారక్ కి జోడీగా తీసుకున్నట్టు టాక్. అందుకే అను విషయంలో తప్పు ఒకరిది.. శిక్ష మరొకరికి.. అన్నట్టు అయింది. “నా పేరు సూర్య” హిట్టయితే తప్ప అను పరిస్థితి మారేలా లేదు.
