“రావణాసురుడి భార్య కూడా వాళ్ల ఆయనను పవన్ కళ్యాణ్ అనే అనుకుంటుంది” .. అనే ఒక్క డైలాగ్ తో హాస్యాన్ని, మరో వైపు విలనిజాన్ని చూపించింది అనుపమ పరమేశ్వరన్. అత్తారింటికి దారేది, సన్నాఫ్ సత్య మూర్తి, తర్వాత మాటల మాంత్రికుడు త్రివిక్రమ్ శ్రీనివాస్ చేసిన సినిమా “అ ఆ”. కుటుంబ విలువల కథాంశంతో తెరకెక్కిన ఈ చిత్రంలో నితిన్, సమంతతో పాటు అనుపమ కూడా కీలక పాత్రలో నటించింది. ఈ సినిమా జూన్ 2న రిలీజ్ కానుంది. ఈ సినిమా ట్రైలర్లో అనుపమ డైలాగ్ ప్రత్యేక ఆకర్షణగా నిలిచింది. ఈ మలయాళం నటి మొదటి సినిమాకే సొంతంగా డబ్బింగ్ చెప్పి తన పాత్రకు కొత్త ఫ్లేవర్ అద్దింది.
అనుపమ మలయాళంలో ప్రేమమ్ సినిమాలో చిన్న పాత్ర చేసింది. పాత్ర చిన్నదైనా పేరు బాగానే వచ్చింది. ఆ సినిమా తెలుగులో “మజ్ను” గా రీమేక్ చేస్తున్నారు. ఇందులోనూ మలయాళం సినిమాలో చేసిన పాత్రలోనే కనిపించనుంది. ఈ చిత్రం రిలీజ్ కాక ముందే “అ ఆ” విడుదల కానుంది. ఇందులో అనుపమది నెగటివ్ షేడ్స్ ఉండే పాత్ర. నరసింహా సినిమాలో నీలాంబరి పాత్రను పోలి ఉంటుందని అనుపమ ఓ ఇంటర్వ్యూ లో చెప్పింది. నితిన్ ను అమితంగా ప్రేమించే కొన్ని సన్నివేశాల్లో మరీ రూడీగా కనిపించనున్నట్లు రివీల్ చేసింది. అయినా ఈ సినిమా తనకి మంచి పేరుని తెచ్చి పెడుతుందని ధీమా వ్యక్తం చేసింది. కెరీర్ తొలినాళ్లలో నెగటివ్ షేడ్స్ ఉన్న పాత్ర చేయడానికి అంగీకరించిన అనుపమ దైర్యాన్ని సినీ వర్గాలు మెచ్చుకుంటున్నాయి.
