మలయాళ భామ అనుపమ పరమేశ్వరన్ మాతృ భాషలో కంటే తెలుగులోనే ఎక్కువ సినిమాలు చేస్తోంది. ఇక్కడి వారు ఆదరించడంతో తెలుగు నేర్చుకొని మరీ నటిస్తోంది. ఆమె నటించిన అ..ఆ , ప్రేమమ్, శతమానం భవతి సినిమాలు హిట్ కావడంతో మరిన్ని ఆఫర్లు ఆమె చేతికి వచ్చాయి. ఉన్నదీ ఒక్కటే జిందగీ, తేజ్ ఐలవ్యూ సినిమాలు కొంత నిరాశపరచడంతో వేగం తగ్గించింది. మంచి హిట్ కొట్టి సినిమాలకు సైన్ చేయాలనీ ఫిక్స్ అయింది. ప్రస్తుతం “నేను లోకల్” ఫేమ్ త్రినాధరావు నక్కి దర్శకత్వంలో తెరకెక్కుతోన్న “హలో గురు ప్రేమ కోసమే” లో హీరోయిన్ గా నటిస్తోంది. ఈ సందర్భంగా అనుపమ మీడియాతో ముచ్చటించింది.
పలు ప్రశ్నలకు ఓపిగ్గా సమాధానం ఇచ్చింది. “మీరు చేయాలనుకుంటున్న రోల్ ఏమైనా ఉందా? అని అడిగితే.. ఆశ్చర్యకరమైన సమాధానమిచ్చింది. నెగటివ్ రోల్స్ చేయాలనీ ఉందని చెప్పి షాకిచ్చింది. “ప్రేక్షకుల్ని నెగిటివ్ షేడ్స్ ఉన్న పాత్రలతో కట్టిపడేయాలని ఉంది. గ్లామర్ రోల్స్ తో పాటు నెగటివ్ రోల్స్ కూడా చేయడానికి నేను సిద్ధం” అని అనుపమ చెప్పింది. క్యూట్ గా ఉండే అనుపమ క్రూరంగా నటిస్తే.. ఆ ఇమేజినేషన్ క్రేజీగా ఉంది. మరి అటువంటి రోల్ ని ఏ దర్శకుడు అనుపమకు ఇస్తారో చూడాలి.
