యంగ్ టైగర్ ఎన్టీఆర్ కి కలిసి వచ్చే రాయలసీమ నేపథ్యం.. మాటల మాంత్రికుడు త్రివిక్రమ్ శ్రీనివాస్ కి అచ్చొచ్చిన కుటుంబ నేపథ్యం.. రెండూ కలిస్తే “అరవింద సమేత వీర రాఘవ”. ఈ సినిమా మొదలయినపుడు ఉండే క్రేజ్ ని ఫస్ట్ లుక్ రెట్టింపు చేసింది. సిక్స్ ప్యాక్ లో తారక్ ని చూసిన అభిమానులు.. సినిమాలో విలన్స్ ని హీరో పేకాట ఆడేస్తాడని ఫిక్స్ అయిపోయారు. ఎన్టీఆర్ అభిమానులకు ఈసారి ఫుల్ మీల్స్ పెట్టడానికి త్రివిక్రమ్ పక్కాగా వెళ్తున్నారు. ఇప్పటికే 40 శాతం షూటింగ్ కంప్లీట్ చేసిన మాటలమాంత్రికుడు పోస్ట్ ప్రొడక్షన్ పనులను కూడా మొదలెట్టేసారు.
ఇప్పటివరకు షూటింగ్, ఎడిటింగ్ పూర్తి చేసుకున్న సన్నివేశాలకు డబ్బింగ్ పనులను ప్రారంభించారు. ఈ సినిమాలో జగపతిబాబు, నాగబాబు రెండు ఫ్యాక్షన్ గ్రూపులకు చెందిన నాయకుల పాత్రల్లో నటిస్తున్నారు. హీరోయిన్స్ గా పూజా హెగ్డే, ఈషా రెబ్బ కనువిందు చేయబోతున్నారు. ఇప్పటికే పూజా హెగ్డేకి సంబంధించిన షూటింగ్ పార్ట్ పూర్తి అయింది. ఈషా రెబ్బతో ఎన్టీఆర్ కాంబినేషన్ సీన్స్ పొలాచ్చిలో షూట్ చేయనున్నారు. హారిక హాసిని క్రియేషన్స్ పతాకం ఫై రాధాకృష్ణ నిర్మిస్తున్న ఈ చిత్రానికి తమన్ సంగీతం అందిస్తున్నారు. భారీ అంచనాలు నెలకొని ఉన్న ఈ చిత్రం అక్టోబర్ 10 న థియేటర్లోకి రానుంది.
