బెల్లంకొండ సాయి శ్రీనివాస్, కాజల్ జంటగా నటిస్తున్న తాజా చిత్రం ‘సీత’. ‘ఏకె.ఎంటర్టైన్మెంట్స్’ బ్యానర్ పై రామబ్రహ్మం సుంకర నిర్మిస్తున్న ఈ చిత్రాన్ని తేజ డైరెక్ట్ చేస్తున్నాడు. ఈ చిత్రంలో డబ్బున్న యువతిగా నెగటివ్ పాత్రలో కాజల్ నటిస్తుంది. ఇటీవల విడుదలైన టీజర్ కు మంచి స్పందనే వచ్చింది. అయితే ఈ చిత్ర రిలీజ్ డేట్ విషయంలో పెద్ద కన్ఫ్యూషన్ ఏర్పడింది. మొదట ఈ చిత్రాన్ని ఏప్రిల్ 25 విడుదల చేయబోతున్నట్టు టాక్ వినిపించింది. కానీ ఇప్పుడు మే 16 కు మార్చారని తాజా సమాచారం. అయితే అది కూడా డౌటే అంటున్నారు ఫిలింనగర్ విశ్లేషకులు.
వివరాల్లోకి వెళితే… ఏప్రియల్ 25న ‘ఎవెంజర్స్’ భారీ స్థాయిలో విడుదలవుతున్న సంగతి తెలిసిందే. దీంతో ఓవర్సీస్ లో ‘సీత’ చిత్రానికి థియేటర్లు దొరకడం కష్టమే. ఇందుకోసం రిలీజ్ డేట్ ను ఖరారు చేశారట. అందులోనూ ఈ ఏప్రిల్ 25 కి ఒక వారం ముందు నాని ‘జెర్సీ’ చిత్రం విడుదలవుతుంది. అలాగే ‘కాంచన 3’ కూడా విడుదల కాబోతుంది. ఈ రెండు చిత్రాలకీ కూడా భారీ క్రేజ్ ఉంది. నాని చిత్రం కాబట్టి ‘జెర్సీ’ ఓవర్సీస్ లో పెద్ద ఎత్తున విడుదలవుతుంది.. ఇక ‘కాంచన3’ చిత్రానికి కూడా బి,సి సెంటర్స్ లో గట్టిగానే విడుదలవుతుంది. అయితే ఇక్కడ ఇంకో సమస్య ఉంది. మహేష్ బాబు ‘మహర్షి’ చిత్రం కూడా మే 9 న విడుదలవుతుంది. ఇది మహేష్ చిత్రం కాబట్టి ఓవర్సీస్ లో 2 వరాల వరకూ థియేటర్లను ఆక్రమించడం ఖాయం. ఇక తెలుగు రాష్ట్రాల్లో కూడా దిల్ రాజు గట్టిగానే రిలీజ్ ప్లాన్ చేస్తున్నాడు. ఇటువంటి పరిస్థితుల్లో ‘సీత’ రిలీజ్ మే 16 న కూడా కష్టమనే చెప్పాలి. మరి చివరికి ఏం జరుగుతుందో చూడాలి..!
