పలు టీవీ సీరియల్స్ లలో నెగిటివ్ క్యారెక్టర్స్ తో బెదిరించి మంచి పేరు తెచ్చుకున్న బుల్లితెర నటుడు బాలాజీ నిజ జీవితంలోను బెదిరింపులకు పాల్పడుతున్నారు. సాయం అందించిన వారికి చేదోడుగా ఉండాల్సింది పోయి కళ్ళెర్ర జేస్తున్నారు. వివరాల్లోకి వెళితే.. నటుడు బాలాజీ భార్య కృష్ణవేణికి రెండు కిడ్నీలు దెబ్బతిన్నాయి. దీంతో యూసు్‌ఫగూడ యాదగిరినగర్‌కు చెందిన భాగ్యలక్ష్మి కిడ్నీ ఇచ్చేందుకు ముందుకొచ్చింది. ఇందుకు 20లక్షలు ఇస్తానని బాలాజీ అంగీకరించి.. 3లక్షలు అడ్వాన్స్‌గా ఇచ్చాడు. గతఏడాది జూన్‌లో విజయవాడలోని ఓ సూపర్‌స్పెషాలిటీ ఆస్పత్రిలో కృష్ణవేణికి కిడ్నీని అమర్చారు.
ఆ తర్వాత మిగిలిన మొత్తం కోసం భాగ్యలక్ష్మి పలుమార్లు బాలాజీని కలిసినా ఫలితం లేకపోయింది. తనకు భర్త లేడని, అనారోగ్యంతో ఉన్న పెద్దకుమార్తె చికిత్స కోసం పైసలు కావాలని అడిగితే.. ఇవ్వకుండా ఇబ్బంది పెడుతున్నాడు. దీంతో భాగ్యలక్ష్మి బుధవారం నటి శ్రీరెడ్డితో కలిసి వచ్చి జూబ్లీహిల్స్‌ పోలీసులకు ఫిర్యాదు చేసింది. బాలాజీ బెదిరింపులకు పాల్పడుతున్నాడని బాధితురాలు ఫిర్యాదులో పేర్కొంది. ఈ సందర్భంగా శ్రీ రెడ్డి మాట్లాడుతూ “భాగ్యలక్ష్మి కి బాలాజీ మాయమాటలు చెప్పి మోసం చేసాడు. ఆమెకి బాసటగా నిలిచేందుకే స్టేషన్‌కు వచ్చాను” అని తెలిపింది. మహిళ సీఐ చంద్రశేఖర్‌ కేసు నమోదు చేసుకొని దర్యాప్తు చేస్తున్నారు.
