కమర్షియల్ డైరక్టర్ మురుగదాస్ దర్శకత్వంలో సూపర్ స్టార్ మహేష్ బాబు చేస్తున్న స్పైడర్ మూవీ ఒక పాట మినహా అంత కంప్లీట్ అయింది. ఏకకాలంలో తెలుగు, తమిళ భాషల్లో తెరకెక్కుతోన్న ఈ మూవీ పోస్ట్ ప్రొడక్షన్ పనులు వేగంగా సాగుతున్నాయి. ఈ సినిమాని సెప్టెంబర్ 27 న థియేటర్ లోకి తీసుకురావడానికి చిత్ర బృందం శ్రమిస్తోంది. ఈ సినిమాకి డబ్బింగ్ చెబుతూనే తన నెక్స్ట్ చిత్రం షూటింగ్ ని మహేష్ నడిపిస్తున్నారు. కొరటాల శివ దర్శకత్వంలో ఆయన చేస్తున్న “భరత్ అనే నేను” మూవీ షూటింగ్ మొదటి షెడ్యూల్ విజయవంతంగా పూర్తి చేసుకుంది. నగర శివార్లలో వేసిన అసెంబ్లీ సెట్ లో కొన్ని సీన్స్ తెరకెక్కించారు.
ఇప్పుడు చిత్ర బృందం తదుపరి షెడ్యూల్ ని లఖ్నో లో ప్లాన్ చేసింది. ఆగస్టు 10 నుంచి మొదలయ్యే ఈ షెడ్యూల్ 22 వరకు కొనసాగనుంది. లఖ్నో లో ప్రాచుర్యం పొందిన జహంగీరాబాద్‌ ప్యాలెస్‌, నడ్వా కళాశాల, ముసాబాఘ్‌ ప్యాలెస్‌ ప్రాంతాల్లో కీలక సన్నివేశాలను షూట్ చేయనున్నారు. భారీ బడ్జెట్ తో డి.వి.వి. దానయ్య నిర్మిస్తున్న ఈ సినిమాలో బాలీవుడ్ బ్యూటీ కైరా అద్వానీ హీరోయిన్ గా ఎంపికైంది. మహేష్, కొరటాల కాంబినేషన్లో వచ్చిన శ్రీమంతుడు మూవీ ఇండస్ట్రీ హిట్ గా నిలిచింది. ఆ కాంబో లో వస్తున్న మూవీ కావడంతో దీనిపై భారీ అంచనాలున్నాయి.
Also, do SUBSCRIBE to our YouTube channel to get latest Tollywood updates.
