ఒక్క ఛాన్స్ అంటూ స్టూడియోల చుట్టూ తిరిగే వారికోసం అద్భుత అవకాశాన్ని ఎన్‌బీకే ఫిల్మ్స్‌ అందిస్తోంది. ఈ సంస్థ నిర్మాణంలో రూపుదిద్దుకోనున్న “ఎన్టీఆర్” బయోపిక్‌ లో కొత్తవారికి ఛాన్స్ కల్పిస్తోంది. నటసింహ నందమూరి బాలకృష్ణ ఎన్టీఆర్ గా నటిస్తున్న ఈ సినిమాని క్రిష్ జాగర్లమూడి తెరకెక్కించనున్నారు. ఎన్టీఆర్ సతీమణి బసవతారం పాత్రని విద్యాబాలన్, ఇందిరాగాంధీ రోల్ ని నదియా, కాంగ్రెస్ నేత, మాజీ ముఖ్యమంత్రి నాదెండ్ల భాస్కర్ రావు పాత్రలో పరేష్ రావెల్, చంద్రబాబునాయుడు పాత్రను రానా పోషించనున్నారు. ఇలా కీలక పాత్రల్లో స్టార్స్ ఖరారు అయిపోయారు.
మరికొన్ని పాత్రలను కొత్త వారితో చేయించాలని క్రిష్ భావించారు. అందుకే కాస్టింగ్ కాల్ పెట్టారు. “నటిస్తూ తెరమీద కనబడుతూ జీవించాలనుకునే వాళ్లు చాలా మంది ఉంటారు. కానీ మంచి అవకాశాలు రానివారు కొందరు.. అలాంటి వారికి ఒక అవకాశం ఇవ్వాలనుకుంటున్నాం” అంటూ ఆ సినిమా యూనిట్‌ ఈరోజు ఓ ప్రకటన చేసింది. ఆసక్తి ఉన్న వారు రెండు ఫొటోలు పంపాలని, అలాగే స్మార్ట్‌ఫోన్‌లో తమ నటన ఏపాటిదో చూపెడుతూ 30 సెకన్లకు మించకుండా ఓ వీడియో తీసి casting.ntrbiopic@gmail.com కి మెయిల్‌ చేయాలని కోరింది. ఈ అవకాశాన్ని ఎంతమంది వినియోగించుకుంటారో చూడాలి.
