బాలు త్వరగా కోలుకోవాలని సెలబ్రిటీల ట్వీట్లు

ఎస్పీ బాలు ఆరోగ్యం విషమించిందని ఆస్పత్రి వర్గాలు ప్రకటించడంతో ఆయన త్వరగా కోలుకోవాలని సినీ ప్రముఖులు, సెలబ్రిటీలు సోషల్ మీడియాలో పేర్కొన్నారు. ఆయన ఆరోగ్యంగా తిరిగొస్తారని విశ్వాసం వ్యక్తం చేస్తున్నారు.

త్వరగా కోలుకోవాలి – సల్మాన్

ఎస్పీబీ త్వరగా కోలుకోవాలని బాలీవుడ్ హీరో సల్మాన్ ఖాన్ ట్వీట్ చేశారు. “ఎస్పీ బాలసుబ్రహ్మణ్యం సార్… మీరు స్పీడ్ గా రికవరీ అవ్వాలని, ధైర్యంగా ఉండాలని మనస్ఫూర్తిగా కోరుకుంటున్నాను. నా కోసం మీరు పాడిన ప్రతి పాట నాకు ప్రత్యేకమే. ప్రతి పాటకు మీకు థాంక్యూ. మీ దిల్ దీవానా హీరో ప్రేమ్. లవ్యూ సార్” అని సల్మాన్ ట్వీట్ చేశారు.

బాలూ గారు… మాకు మీరు కావాలి – దేవిశ్రీ ప్రసాద్

ఎస్పీబీగారి కోసం అందరం ప్రార్ధన చేద్దామని సంగీత దర్శకుడు దేవిశ్రీ ప్రసాద్ పిలుపు ఇచ్చారు. “బాలూ సార్… మాకు మీరు కావాలి. ప్రపంచానికి మీరెంతో ఆనందాన్ని ఇచ్చారు. త్వరగా కోలుకుని తిరిగి రండి. ఆయన ఆరోగ్యంగా తిరిగి వస్తారన్న నమ్మకం నాకుంది. లెజెండరీ గాయకుడి కోసం మనమంతా ప్రార్థనలు చేద్దాం” అని దేవిశ్రీ ప్రసాద్ ట్వీట్ చేశారు.

మామా… గెట్ వెల్ సూన్ – సంగీత దర్శకుడు తమన్

మై డియర్ మామ ఎస్పీ బాలసుబ్రహ్మణ్యంగారితో లాక్‌డౌన్‌కి ముందు మార్చిలో తీసుకున్నానని తమన్ ఒక వీడియో ట్వీట్ చేశారు. సంగీత దర్శకులు కోటి, మణిశర్మ, డ్రమ్స్ ప్లేయర్ శివమణి తదితరులు అందులో ఉన్నారు. ఇప్పుడు ఆ వీడియో చూసి తన కళ్లలో నీళ్లు ఆగడం లేదని తమన్ పేర్కొన్నారు. ‘ప్లీజ్ మామా త్వరగా కోలుకో… లవ్యూ మామ. అందరూ ప్రార్థనలు చేయండి” అని తమన్ అన్నారు.

హీరోయిన్ కీర్తీ సురేష్, యాక్టర్ ఖుష్బూ సుందర్, ప్రొడ్యూసర్ బండ్ల గణేష్ తదితరులు ‘గెట్ వెల్ సూన్ ఎస్పీబీ సార్’ అని ట్వీట్లు చేశారు. సినిమా రంగంలో సెలబ్రిటీలు అందరూ ఆయన కోలుకోవాలని ప్రార్థిస్తున్నారు.