సాధారణంగా సినిమాలకు ప్రారంభోత్సవమప్పుడు, ఆడియో విడుదల, సినిమా రిలీజ్ డేట్ ఎనౌన్స్ మెంట్ టైమ్ లో ప్రెస్ నోట్స్ రిలీజ్ చేయడం అనేది సర్వసాధారణంగా జరిగే విషయం. మహా అయితే.. సినిమా రిలీజైన తర్వాత కలెక్షన్స్ గురించి ప్రెస్ నోట్స్ రిలీజ్ చేస్తుంటారు. కానీ.. 2016లో విడుదలై సూపర్ ఫ్లాప్ గా నిలిచిన “చుట్టాలబ్బాయి” అనే చిత్రం శాటిలైట్ హక్కులను ఈటీవీ సంస్థ సొంతం చేసుకోవడం గురించి కూడా ప్రెస్ నోట్ రిలీజ్ చేయడం చర్చనీయాంశం అయ్యింది.
ఆది కథానాయకుడిగా వీరభద్రం దర్శకత్వంలో తెరకెక్కిన ఈ చిత్రం దారుణంగా విఫలమైంది. ఈ సినిమా విడుదలై, వెళ్లిపోయిందన్న విషయాన్ని ఆది కూడా మర్చిపోయే ఉంటాడు. అలాంటప్పుడు ఈ సినిమాకి ఇప్పుడు శాటిలైట్ బిజినెస్ అయ్యిందనే విషయాన్ని ప్రెస్ నోట్ ద్వారా రిలీజ్ చేయడం అనేది పుండు మీద కారం జల్లినట్లే ఉంటుంది. ప్రస్తుతం ఆది హీరోగా ఓ రెండు సినిమాలు చేస్తూ బిజీగా ఉన్నాడు. బహుశా ఈ విషయం తెలిస్తే “ఏంటీ ఆ సినిమాకి శాటిలైట్ బిజినెస్ ఇప్పుడు అయ్యిందా?” అని మనోడు కూడా షాక్ అవుతాడేమో.
