స్టైలిష్ స్టార్ అల్లు అర్జున్ సరైనోడు చిత్రం తర్వాత చేస్తున్న సినిమా దువ్వాడ జగన్నాథమ్. హరీష్ శంకర్ దర్శకత్వంలో తెరకెక్కుతున్న ఈ మూవీలో బన్నీ ద్విపాత్రాభినయం చేస్తున్నారు. శ్రీ వెంకటేశ్వర క్రియేషన్స్ పతాకంపై రూపొందుతున్న 25వ చిత్రమిది. భారీ బడ్జెట్ తో దిల్‌రాజు నిర్మిస్తున్న ఈ ఫిల్మ్ లో బన్నీ సరసన ముకుంద ఫేమ్ పూజ హెగ్డే నటిస్తోంది. ఇదివరకు అల్లు అర్జున్ కి మంచి హుషారైన పాటలను ఇచ్చిన రాక్ స్టార్ దేవీ ప్రసాద్ డీజే కోసం అదిరిపోయే ఆల్బమ్ ని రీసెంట్ గా కంపోజ్ చేశారు.
ఈ సినిమా రెగ్యులర్ షూటింగ్ ఈ రోజు (గురువారం) హైదరాబాద్ లో ప్రారంభమయింది. ఆర్ట్ డైరక్టర్ రవీందర్ వేసిన ప్రత్యేకమైన సెట్ లో అల్లు అర్జున్ పై కీలక సీన్లను ఈ షెడ్యూల్ లో పూర్తిచేయనున్నట్లు చిత్ర బృందం వెల్లడించింది. చిత్రీకరణలో విరామం లేకుండా ఫిబ్రవరికి మూవీని కంప్లీట్ చేయనున్నట్లు తెలిపింది. వచ్చే ఏడాది మార్చిలో డీజే ని రిలీజ్ చేయాలని హరీష్ శంకర్ భావిస్తున్నారు.
