‘ఆలా ఎలా’తో టాలీవుడ్ ఎంట్రీ ఇచ్చినా సుకుమార్ సృష్టించిన ‘కుమారి’ పేరుతోనే ప్రేక్షకుల మనసుల్లో కొలువుండిపోయింది హేబ పటేల్. ‘ఈడోరకం ఆడోరకం’ అనే ప్లాప్ సినిమాతో ఈ సంవత్సరం క్యాలెండర్ తెరిచిన ఈ ముంబై భామ ఇటీవల తెరమీదికొచ్చిన ‘ఎక్కడికి పోతావు చిన్నవాడా’ సినిమాతో హిట్ కొట్టింది. ఇక్కడితో 2016ని ముగించేస్తుందిలే అనుకుంటే పొరపాటే. సరిగ్గా నెలలోనే మరో సినిమాతో తెరమీదికి రానుంది ఆ అమ్మడు. హేబ పటేల్, తేజస్విని, రావు రమేష్, పార్వతీశం, అశ్విన్, నోయల్ సేన్ ప్రధాన పాత్రల్లో నటించిన చిత్రం ‘నాన్న నేను నా బాయ్ ఫ్రెండ్స్’. బెక్కం వేణుగోపాల్ నిర్మించిన ఈ సినిమాని దిల్ రాజు విడుదల చేస్తున్నారు.
భాస్కర్ బండి దర్శకుడిగా పరిచయం కానున్న ఈ సినిమా డిసెంబర్ 9న తెరమీదకి రానుంది. ఇప్పటికే నిర్మాణాంతర కార్యక్రమాలు తుది దశకు చేరుకోగా ప్రచార కార్యక్రమాలు జోరందుకున్నాయి. వచ్చేవారం శేఖర్ చంద్ర సంగీతం అందించిన పాటలు విడుదల కానున్నాయి. కూతురే ప్రపంచంగా బతుకుతున్న తండ్రికి బాయ్ ఫ్రెండ్స్ రూపంలో కూతురు ఎలాంటి షాక్ ఇచ్చింది.. దాని పర్యవసానమేమిటి అన్నదే కథ. ఏ ముహూర్తాన ‘కుమారి’ సైన్ చేసిందో గానీ ఈ కుమారికి అన్నీ టామ్ బాయ్ తరహా పాత్రలే వస్తున్నాయ్. ఇదే కొనసాగితే ఆమె తెరమరుగమయ్యే కాలం ఎంతో దూరంలో లేదు. ఈ సంగతిలా ఉంచితే.. హేబ ఈ సినిమాతో హిట్ కొడుతుందా లేదా అన్నది అసలు విషయం.
Also, do SUBSCRIBE to our YouTube channel to get latest Tollywood updates.
