గత శుక్రవారం విడుదలైన “ఏజెంట్ సాయి శ్రీనివాస ఆత్రేయ” ఎవ్వరూ ఊహించని విధంగా ఘన విజయం సొంతం చేసుకొన్న విషయం తెలిసిందే. చాలా డిఫరెంట్ కథాంశంతో టిపికల్ డిటెక్టివ్ కామెడీ థ్రిల్లర్ గా తెరకెక్కిన ఈ చిత్రాన్ని ప్రేక్షకులతోపాటు విశ్లేషకులు కూడా ప్రశంసించారు. ఇండస్ట్రీ పెద్దలు మొదలుకొని సీనియర్ డైరెక్టర్స్ అందరూ చిత్రబృందంపై అభినందనల వర్షం కురిపిస్తున్నారు. కానీ.. మన నేచురల్ స్టార్ నాని మాత్రం “ఏజెంట్ సాయి శ్రీనివాస ఆత్రేయ” విజయం విషయంలో చాలా టెన్షన్ పడుతున్నాడని తెలుస్తోంది. అదేంటి ఆ సినిమా హిట్ అయితే నాని ఎందుకు టెన్షన్ పడతాడు, ఇంకా సంతోషిస్తాడు కానీ అనుకుంటున్నారా
.
దానికో మంచి రీజన్ ఉందండోయ్.. విషయం ఏంటంటే నాని ప్రస్తుతం నటిస్తున్న “గ్యాంగ్ లీడర్” సినిమా కథ, “ఏజెంట్ సాయి శ్రీనివాస ఆత్రేయ” కథనం ఒకేలా ఉన్నాయట. ఈ విషయం సినిమా రిలీజయ్యాక తెలిసింది “గ్యాంగ్ లీడర్” టీం కి. రెండు సినిమాల నేపధ్యం వరుస హత్యలేనట. ఆ హత్యలను ఇన్వెస్టిగేట్ చేస్తున్న తరుణంలో ఒక పెద్ద స్కామ్ గురించి తెలుసుకొంటారు నాని & గ్యాంగ్. అందుకే ఆ చిత్రానికి “గ్యాంగ్ లీడర్” అనే పేరు పెట్టారు. మరి ఫిలిమ్ నగర్ లో చక్కర్లు కొడుతున్న ఈ వార్తలో నిజమెంతో తెలియదు కానీ.. ఒకవేళ నిజమే అయినా నాని టెన్షన్ పడాల్సిన అవసరం మాత్రం లేదు. ఎందుకంటే.. నటుడిగా నాని పెర్ఫార్మెన్స్ తో మ్యాజిక్ చేస్తే.. దర్శకుడు విక్రమ్ కుమార్ తన స్క్రీన్ ప్లేతో అద్భుతాలు సృష్టించగల సత్తా ఉన్న వ్యక్తి. ఈ ఇద్దరి కాంబినేషన్ సినిమా కాబట్టి ఒకవేళ కథనం కానీ మూల కథ కానీ ఒకేలా ఉన్నా.. డీలింగ్ మాత్రం కచ్చితంగా డిఫరెంట్ గా ఉంటుంది. అయినా ఈ వార్తలో నిజం ఎంత అనేది సినిమా విడుదలయ్యాకే తెలుస్తుంది.
