మెగాస్టార్ చిరంజీవి ఖైదీ నంబర్ 150 తర్వాత చేస్తున్న మూవీ “సైరా నరసింహ రెడ్డి”. కొణిదెల ప్రొడక్షన్ బ్యానర్లో రామ్ చరణ్ తేజ్ నిర్మిస్తున్న ఈ సినిమా వేగంగా షూటింగ్ జరుపుకుంటోంది. డైరక్టర్ సురేందర్ రెడ్డి దర్శకత్వంలో రూపుదిద్దుకుంటున్న ఈ సినిమాలో కీలక పాత్రలను బిగ్ బీ అమితాబ్ బచ్చన్, జగపతి బాబు, కిచ్చ సుదీప్, విజయ్ సేతు పతి పోషిస్తున్నారు. అలాగే మరో ముఖ్య పాత్రలో మిల్కీ బ్యూటీ తమన్నా నటిస్తున్న సంగతి తెలిసిందే. అంతేకాదు ముగ్గురు భామలు చిరు పక్కన రొమాన్స్ చేయనున్నారు. అందులో ప్రధాన హీరోయిన్ గా సైరాకి మొదటి భార్యగా నయనతార నటిస్తోంది. అలాగే మూడో భార్యగా కంచె, నక్షత్రం వంటి సినిమాలతో అభిమానులను సంపాదించుకున్న ప్రగ్యా జైస్వాల్‌ కనిపించనుంది.
ఇక రెండో భార్య గా ఎవరిని తీసుకోవాలని చిత్ర యూనిట్ కొన్ని రోజులుగా అనేకమంది హీరోయిన్స్ పేర్లని పరిశీలించింది. చివరికి ఆ అవకాశం హ్యూమా ఖురేషి కి దక్కినట్లు సమాచారం. ఈ మధ్య రిలీజ్ అయిన ‘కాలా’ సినిమాలో రజనీతో ఈమె కలిసి నటించింది. ఆమె నటన బాగుండడంతో సైరాలో తీసుకున్నారు. త్వరలోనే ఆమె షూటింగులో జాయిన్ కానుంది. ఫాస్ట్ అండ్ ఫ్యూరియస్ 6, హ్యారీపోర్టర్, స్కై ఫాల్ వంటి అద్భుత చిత్రాలకు స్టంట్ డైరెక్టర్ గా పని చేసిన గ్రెగ్ పావెల్ ఆధ్వర్యంలో ప్రస్తుతం భారీ యాక్షన్ సీన్ చిత్రీకరణ సాగుతోంది. దీని తర్వాత షెడ్యూల్లో పాటలను షూట్ చేయనున్నట్లు ఫిలిం నగర్ వాసులు చెప్పారు.
