పవర్ స్టార్ పవన్ కళ్యాణ్ మల్టీ స్టారర్ మూవీ చేసేందుకు గ్రీన్ సిగ్నల్ ఇచ్చారు. తమిళ నటుడు అజిత్ తో కలిసి సినిమా చేసేందుకు తనకి ఎటువంటి అభ్యంతరం లేదని చెప్పారు. నిన్న, మొన్న లండన్లో జరిగిన యుక్తా (యునైటెడ్ కింగ్‌డమ్ తెలుగు అసోసియేషన్) 6వ వార్షికోత్సవ వేడుకల్లో పవన్ పాల్గొన్నారు. ఈ వేడుకల అనంతరం పవర్ స్టార్ ఎన్నారై లతో కలిసి డిన్నర్ చేశారు. ఈ సందర్బంగా అక్కడి అభిమానులు అడిగిన ప్రశ్నలకు నవ్వుతూ సమాధానం ఇచ్చారు.
ఇందులో భాగంగా అభిమానులకు సినీ తారలకు మధ్య దూరాన్ని తగ్గించేందుకు ఏర్పడిన ప్రత్యేకమైన యాప్ “ఫ్యాన్ స్టేషన్” లో ఓ అభిమాని అడిగిన ప్రశ్నను పవన్ ముందు ఉంచారు. “మీరు తమిళ నటుడు అజిత్ తో కలిసి సినిమాలో నటిస్తారా?” అనే ప్రశ్నను సంధించారు. అందుకు ఆయన “ఇప్పటి వరకు నా వద్దకు అలాంటి ప్రపోజల్ తో ఎవరూ రాలేదు. ఒక వేళ ఎవరైనా వస్తే తప్పకుండా చేస్తాను” అని సమాధానం ఇచ్చారు. ప్రస్తుతం అజిత్ నటించిన “వీరమ్” సినిమానే పవన్ తెలుగులో రీమేక్ చేస్తున్నారు. ఇద్దరి ఏజ్, స్క్రీన్ ఏజ్ దాదాపు ఒకటే.
తమిళ రాష్ట్రంలో అజిత్ కి ఎంత ఫాలోయింగ్ ఉందో, తెలుగు రాష్టాల్లో పవర్ స్టార్ కి అంతే క్రేజ్ ఉంది. వీరిద్దరూ కలిసి నటించే సినిమాకు రెండు భాషల్లో మంచి బిజినెస్ ఉంటుంది. వందకోట్లతో తీసినా సునాయాసంగా వసూల్ చేయగలదు. అంతటి భారీ మల్టీ స్టారర్ సినిమాకు పవన్ ఒకే చెప్పారు.. ఇక కథను రెడీ చేసే బాధ్యత దర్శకులపైనే ఉంది.
