సినిమా ఆఫర్లు లేక కొందరు హీరోయిన్స్ బాధపడితే.. వచ్చిన ఆఫర్స్ వల్ల బాధపడే హీరోయిన్స్ ఇంకొందరు. ప్రస్తుతం రెజీనా రెండో రకమైన ఇబ్బందిని ఎదుర్కొంటుంది. ఖాతాలో భారీ హిట్ లు లేకపోయినా స్టార్ హీరోలతో పరిచయాలు, యంగ్ హీరోస్ తో స్నేహసంబంధాలు పుష్కలంగా ఉండడంతో అమ్మడి కెరీర్ ఇప్పటివరకూ బానే సాగింది. తెలుగులో అవకాశాలు లేకపోయినా తమిళంలో ఆఫర్లు అందిపుచ్చుకొని కనుమరుగవ్వకుండా నెట్టుకొస్తోంది. అయితే.. అమ్మడికి ఒక భారీ సినిమా ఆఫర్ దక్కినట్లు తెలుస్తోంది.
బాలకృష్ణ కథానాయకుడిగా కె.ఎస్.రవికుమార్ దర్శకత్వంలో రూపొందుతున్న “కర్ణ” (వర్కింగ్ టైటిల్)లో ఇప్పటికే నయనతార, నటాషా (మలయాళీ హీరోయిన్) కథానాయికలుగా నటిస్తుండగా.. మరో హీరోయిన్ గా రెజీనాను ఎంపిక చేశారట. బాలయ్య లాంటి అగ్ర కథానాయకుడి సరసన నటించే అవకాశం కావడంతో కాదనలేక ఒప్పుకొన్న రెజీనా.. ఇప్పుడు “నెక్స్ట్ ఏంటో” అని విపరీతంగా ఆలోచించేస్తుంది. ఎందుకంటే.. బాలయ్య లాంటి సీనియర్ హీరోతో నటించిన రెజీనాను యంగ్ హీరోస్ తమ పక్కన జోడీ కట్టేందుకు సెలక్ట్ చేసుకొంటారా అనేది ప్రస్తుతం ప్రశ్నార్ధకం. సినిమా హిట్ అయితే పర్లేదు కానీ.. ఏమాత్రం తేడా కొట్టినా రెజీనా దాదాపుగా దుకాణం సర్ధేసుకోవాల్సిన దుస్థితి ఏర్పడుతుంది.
