‘జబర్దస్త్’ లో లేడీ గెటప్ లతో పాపులర్ అయిన వాళ్లలో పవన్ ఒకడు. ఇటీవల ఓ ఇంటర్వ్యూలో పాల్గొని తన కెరీర్ గురించి చెప్పుకొచ్చిన పవన్.. డైరెక్టర్ అమ్మ రాజశేఖర్ పై చేసిన కామెంట్స్ ఇప్పుడు టాక్ ఆఫ్ ది టౌన్ అయ్యాయి. పవన్ మాట్లాడుతూ.. “సినిమాల పై ఇంట్రెస్ట్ కొద్దీ హైదరాబాద్‌ కు వచ్చాను. ఇక్కడికి వచ్చిన కొత్తలో దిల్ షుక్ నగర్‌లో ఉండేవాడిని. అప్పుడు నా దగ్గర డబ్బులు ఉండేవి కావు.. పూట గడవటమే చాలా కష్టంగా ఉండేది. గురువారం బాబా గుడిలో పెట్టే ప్రసాదం కోసం ఎదురుచూసిన రోజులు కూడా ఉన్నాయి. దిల్ షుక్ నగర్లోనే ఓ చిన్నగదిలో ఉంటూ సినిమా ఛాన్స్ ల కోసం ట్రై చేసేవాడిని.ఆ తరువాత ఇండస్ట్రీలో ఏదో రకంగా ఎంటర్ అవ్వాలని కూలీగా, మేకప్‌ అసిస్టెంట్‌గా, చివరికి మేస్త్రీగా కూడా పనికి వెళ్ళేవాడిని.
ఆ టైములో ఓ సారి లేడీ గెటప్ అవకాశాలు రావటంతో ఒప్పుకున్నాను. కానీ ఆ క్యారెక్టర్లు చేస్తున్నందుకు చాలామంది నన్ను అవమానించేవారు.దాంతో నాకు చచ్చిపోవాలనిపించేది.అటు తరువాత డ్యాన్స్‌ అసిస్టెంట్‌గా కూడా పనిచేశాను. అప్పుడు డైరెక్టర్ అమ్మా రాజశేఖర్ పరిచయం అయ్యారు. ఆయన దగ్గరే పనికి చేరాను. ఆయన నాకు సినిమాల్లో అవకాశం ఇస్తానని చెప్పాడు.సరే కదా అని ఆయన వ్యక్తిగత పనులు కూడా చేసి పెట్టేవాడిని. ఆయన బట్టలు ఉతకటం, కాళ్లు పట్టడం వంటి పనులన్నీ నేనే చేసేవాడిని. అమ్మ రాజశేఖర్ భార్య కూడా ఆయన్ని అంతలా చూసి ఉండదు. అంతకంటే ఎక్కువగానే చూసుకున్నాను.
కానీ ‘ఖతర్నాక్’ సినిమాలో ఛాన్స్ ఇస్తాడు అనుకుంటే.. ‘నువ్వు సినిమాల్లో చేస్తావా..? నీ ఫేస్‌ అద్దంలో చూసుకున్నావా..?’ అని అవమానించాడు. అయినా సరే అవన్నీ భరిస్తూ అవకాశం కోసం ఆయన దగ్గరే ఉన్నాను. తరువాత ఆయన ‘టక్కరి’ సినిమాలో అవకాశం ఇస్తాడు అనుకుంటే.. అదీ లేదు. దాంతో ఆయన దగ్గర పని మానేసి బయటకు వచ్చేశాను. కొద్ది రోజుల తర్వాత ‘ఢీ’ షోలో అసిస్టెంట్‌గా పనిచేసాను. కొంతకాలానికి ‘జబర్థస్త్’ లో అవకాశం వచ్చింది” అంటూ అతను చెప్పుకొచ్చాడు.
