మెగాస్టార్ చిరంజీవి 150 వ చిత్రం షూటింగ్ వేగంగా జరుపుకుంటోంది. రెండో షెడ్యూల్ ప్రారంభమైనా ఇంకా ఇందులో చిరుతో రొమాన్స్ చేసే నటి ఫిక్స్ కాలేదు. అంతేకాదు మెగాస్టార్ ను ఢీకొనే ప్రతి కథానాయకుడి గురించి చిత్ర బృందం ఇంకా ఒక నిర్ణయం తీసుకోలేదు. మెగా పవర్ స్టార్ రామ్ చరణ్ నిర్మిస్తున్న ఈ సినిమాలో తొలుత విలన్ గా జగపతి బాబుని అనుకున్నారు. లెజెండ్ తో విలన్ గా టర్న్ తీసుకున్న ఈ హీరో అన్ని రకాల పాత్రలు చేయడానికి సై అంటున్నారు. గత కొంత కాలంగా ఆయన కంటే బెటర్ యాక్టర్ కోసం వి.వి.వినాయక్ వెతికారు. ఎవరూ సూట్ కావడం లేదు. సీనియర్ నటుడు అయిన చిరంజీవితో తలపడగల సత్తా, స్క్రీన్ ఇమేజ్ జగ్గుకి మాత్రమే ఉందని డైరక్టర్ ఫిక్స్ అయ్యారని ఫిల్మ్ నగర్ తాజా సమాచారం.
ప్రస్తుతం జగపతి బాబు చేతి నిండా సినిమాలతో బిజీగా ఉన్నారు. డైరెక్టర్ పూరీ జగన్నాథ్ దర్శకత్వంలో కళ్యాణ్ రామ్ హీరో నటిస్తున్న “ఇజం” సినిమాలో కీలక పాత్ర పోషిస్తున్నారు. కింగ్ నాగార్జున “ఓం నమో వెంకటేశ”లో, బాలకృష్ణ 100వ చిత్రం ”గౌతమిపుత్ర శాతకర్ణి”లో ప్రత్యేక పాత్రలో కనిపించనున్నారు. ఇప్పుడు చిరు చిత్రంలో విలనిజం ప్రదర్శించనున్నారు. ఈ విషయాన్ని వి.వి.వినాయక్ త్వరలో వెల్లడించనున్నారు.
