హిట్ డైరక్టర్ కొరటాల శివ హ్యాట్రిక్ అందుకోవాలని శ్రమిస్తున్న సినిమా జనతా గ్యారేజ్. ఇందులో యంగ్ టైగర్ ఎన్టీఆర్ మాస్ ని ఆకట్టుకునే పాత్రలో మరోమారు రెచ్చి పోనున్నారు. మైత్రి మూవీ మేకర్స్ నిర్మిస్తున్న ఈ మూవీ షూటింగ్ దాదాపు పూర్తి అయింది. ఆగస్టు ఒకటవ తేదీ నుంచి కేరళలోని అందమైన జలపాతాల వద్ద తారక్, సమంత ల పై రొమాంటిక్ సాంగ్ ని చిత్రీకరిస్తున్నారు.
ఈ షూటింగ్ కి సంబంధించిన ఓ ఫోటోను సోషల్ మీడియాలో మంగళవారం సమంత పోస్ట్ చేసింది. అందులో సమంత, ఎన్టీఆర్, దర్శకుడు కొరటాల శివ తో పాటు చిత్ర యూనిట్ సభ్యులు కూడా ఉన్నారు. “షూటింగ్ ని కాసేపు ఆపి మాతో ఫోటో దిగేందుకు డైరక్టర్ శివ ఒప్పుకున్నారు” అంటూ బ్యూటీ ట్వీట్ చేసింది. ఈ పాటను వేగంగా షూట్ చేసి నగరానికి వచ్చి ఈనెల 12 న చిత్ర ఆడియోను రిలీజ్ చేయనున్నారు.
ఆ తర్వాత మిగిలిన ఒక పాత, కొన్ని యాక్షన్ సన్నివేశాల చిత్రీకరణకోసం కొరటాల టీమ్ విదేశాలకు వెళ్లనుంది. మలయాళ సూపర్ స్టార్ మోహన్ లాల్ ప్రత్యేక పాత్రలో నటిస్తున్న ఈ సినిమాను సెప్టెంబర్ 2 న విడుదల చేసేందుకు సన్నాహాలు చేస్తున్నారు.
