అతిలోక సుందరి శ్రీదేవి పెద్ద కుమార్తె జాన్వి “దఢక్” సినిమాతో ప్రేక్షకుల ముందుకొచ్చింది. తొలి సినిమాతోనే అనుమానాలను పటాపంచలు చేసింది. అభినందనలు అందుకుంది. ఇందులో జాన్వి నటనను విమర్శకులతోపాటు సినీ ప్రముఖులు సైతం మెచ్చుకున్నారు. అంతేకాదు ఈ సినిమా వందకోట్ల క్లబ్ లో చేరి ఔరా అనిపించింది. తొలి అడుగు విజయవంతంకావడంతో జాన్వీకి సహజంగానే ఆఫర్లు వెల్లువెత్తాయి. అయితే జాన్వీ మాత్రం తన తల్లికి వీరాభిమానులు ఎక్కువగా ఉన్న దక్షిణాదిన సినిమా చేయాలనీ ఆశపడుతోందని, తెలుగు హీరో విజయ్ దేవరకొండ సరసన నటించవచ్చని సినీ విశ్లేషకుడు రమేశ్ బాలా రీసెంట్ గా ట్వీట్ చేశారు.
ఒకేసారి తెలుగు, తమిళ భాషల్లో సినిమా చేస్తుందని చెప్పారు. ఈ విషయం అన్ని పరిశ్రమలో హాట్ టాపిక్ అయింది. శ్రీదేవి దక్షిణాది అభిమానులు సంతోషపడుతూ.. స్వాగతం పలికారు. సోషల్ మీడియాలో ఈ న్యూస్ వైరల్ అయింది. దీంతో జాన్వీ స్పందించింది. సౌత్ సినిమాల్లోకి తాను ఎంట్రీ ఇస్తున్న వార్తల్లో నిజం లేదని స్పష్టం చేసింది. “ప్రస్తుతం నేను హిందీ సినిమాలతో బిజీగా ఉన్నాను. నా దృష్టి మొత్తం బాలీవుడ్ సినిమాలపైనే ఉంది” అని జాన్వీ వెల్లడించింది. ఆమె మాటలు శ్రీదేవి అభిమానులను కొంత నిరాశపరిచింది.
