తెలుగు చిత్ర పరిశ్రమలో నవరసాలను సులువుగా పలికించగల నటుల్లో యంగ్ టైగర్ ఎన్టీఆర్ ఒకరు. డ్యాన్స్, ఫైట్స్ చేయడంలో తిరుగులేదు. అటువంటి తారక్.. తన తాతగారి (ఎన్టీఆర్) పాత్రను చేయడం అసాధ్యమని చెప్పి అందరినీ ఆశ్చర్యపరిచారు. వివరాల్లోకి వెళితే… అభినేత్రి సావిత్రి బయోపిక్ ని నాగ్ అశ్విన్ తెరకెక్కించారు. మహానటిగా కీర్తి సురేష్ నటించింది. అలాగే అలనాటి నటీనటుల పాత్రలను ప్రకాష్ రాజ్, క్రిష్ తదితరులు పోషించారు. ఇందులో ఎన్టీఆర్ రోల్ చేయమని తారక్ ని కోరగా నో చెప్పారు. ఆ విషయాన్ని నిన్న మహానటి ఆడియో వేడుకలో ఎన్టీఆర్ వివరించారు. “నిర్మాత స్వప్న ఓ రోజు నా వద్దకు వచ్చి మహానటి సినిమాలో గెస్ట్ రోల్‌గా తాతగారి వేషాన్ని వేయాలని కోరింది.
అయితే, నేను వేయలేనని చెప్పేశాను. ఈ విషయాన్ని ఇప్పటికే చాలాసార్లు చెప్పాను. ఆయన వేషం వేసే అర్హత నాకు లేదు. ఆయన పాత్ర పోషించడం ఈ జన్మలో జరిగే పనికాదు. తాతగారి పాత్రను పోషించే దమ్ము నాకు లేదు. ఈ సినిమాలో నటించేందుకు అంగీకరించిన దుల్కర్, కీర్తి, సమంత, విజయ్‌లకు హ్యాట్సాఫ్. చాలెంజింగ్‌గా తీసుకుని ఈ చిత్రాన్ని చేస్తున్నందుకు వారిని అభినందిస్తున్నాను” అని అన్నారు. ఎన్నో అంచనాలు నెలకొని ఉన్న మహానటి ఈనెల 9 న తెలుగు, తమిళ భాషలో రిలీజ్ కానుంది.
