ఇవాళ ఉదయం విశ్వవిఖ్యాత నటసార్వభౌమ ఎన్టీయార్ జీవితం ఆధారంగా బాలయ్య నటిస్తూ నిర్మిస్తున్న “ఎన్టీఆర్” బయోపిక్ ప్రారంభోత్సవం అత్యంత ఘనంగా జరిగిన విషయం తెలిసిందే. ఈ వేడుకకు రాజకీయ మరియు సినీ ప్రముఖులు భారీ సంఖ్యలో హాజరయ్యారు. నందమూరి కుటుంబానికి సంబంధించిన హీరోలందరూ కూడా దాదాపుగా ఈ వేడుకలో పాలుపంచుకొన్నారు. కానీ.. నందమూరి కుటుంబంలో ముఖ్యమైన మనవడు, తాతయ్య పేరు నిలబెట్టిన ఘనుడు జూనియర్ ఎన్టీయార్ మాత్రం ఎక్కడా కనిపించలేదు సరికదా కనీసం మనోడి పేరు ఎక్కడా వినబడలేదు.
దాంతో ఒక వర్గం నందమూరి అభిమానులు ఈ విషయమై కాస్త బాధపడ్డారని తెలుస్తోంది. ఎన్టీఆర్ పేరు పెట్టుకోవడమే కాక ఆయన పేరుకి కీర్తిని తీసుకొచ్చి ప్రస్తుత తరాలకి ఎన్టీయార్ అనే పేరుని పరిచయం చేసిన జూనియర్ ఎన్టీయార్ ని “ఎన్టీఆర్ బయోపిక్” ప్రారంభోత్సవానికి ఎన్టీఆర్ ను పిలకపోవడం వెనుక కారణం ఏంటో ఎవరికీ తెలియడం లేదు. ఎందుకంటే.. పిలిస్తే తాతయ్య జీవితం ఆధారంగా తెరకెక్కుతున్న చిత్ర ప్రారంభోత్సవానికి ఎన్టీఆర్ రాకుండా మాత్రం ఉండడన్నది అందరికీ తెలిసిన నిజం. ఏదేమైనా పెద్ద ఎన్టీయార్ కి అత్యంత ప్రీతిపాత్రుడైన జూనియర్ ఎన్టీఆర్ ఈ వేడుకలో కనిపించకపోవడం మాత్రం చర్చనీయాంశం అయ్యింది.
