సర్దార్ సినిమా విడుదల కాగానే పవన్ తర్వాతి సినిమా ఆరంభించడం చూసి.. మునుపెన్నడూ లేనంత స్పీడ్ గా పవన్ సినిమాలు చేస్తున్నారంటూ అభిమానులంతా ఆనందం వ్యక్తం చేశారు. తరువాత దర్శకుడు, ఇతర టెక్నీషియన్లు మారడం, వీటికి తోడు పవన్ రాజకీయ సభలు వెరసి సినిమా ఆలస్యమవుతూ వచ్చింది. వీటన్నిటినీ దాటుకుని ఇటీవల సెట్స్ మీదికెళ్లింది ఈ సినిమా. ‘కాటమరాయుడు’ పేరుతో కిషోర్ కుమార్ పర్ దాసాని (డాలీ) తెరకెక్కిస్తున్న ఈ సినిమా షూటింగ్ లో పవన్ ఎంట్రీ ఇచ్చిన సంగతి తెలిసిందే.
సెట్స్ లోకి వచ్చిందే తడవుగా ఇక సినిమా ఆలస్యమవడానికి వీల్లేదని సూచించారట. అందుకు తగ్గట్టే షెడ్యూల్స్ మధ్యలో పెద్దగా గ్యాప్ ఉండకుండా ప్లాన్ చేస్తున్నారట దర్శకుడు డాలీ అండ్ టీమ్. ముందుగా పవన్ కి సంబంధిచిన పార్ట్ చిత్రీకరణ పూర్తి చేయడానికి దర్శకుడు కసరత్తులు చేస్తున్నాడట. తద్వారా పోస్ట్ ప్రొడక్షన్ పనులు మరింత వేగంగా పూర్తవుతాయని భావిస్తున్నారు. ఇదే వ్యూహంతో ముందుకెళితే ఈ సంవత్సరాంతంలోగా సినిమా పూర్తవుతుందని ధీమా వ్యక్తం చేస్తున్నారు. ఇదంతా తర్వాతి సినిమాలపై ప్రభావం చూపకుండా ఉండేందుకే అని తెలుస్తోంది. ముఖ్యంగా త్రివిక్రమ్ సినిమాని ఆన్ టైమ్ లో పట్టాలెక్కించాలన్నది పవన్ ప్లాన్.
