తెలుగు సినిమాను అంతర్జాతీయ స్థాయిని తీసుకెళ్లిన బాహుబలికి కొనసాగింపుగా వస్తున్న బాహుబలి 2 వేగంగా షూటింగ్ జరుపుకుంటోంది. ఇది తన సినీ కెరీర్ లో మరుపురాని చిత్రంగా నిలిచేందుకు యంగ్ రెబల్ స్టార్ ప్రభాస్ శ్రమిస్తున్నారు. ప్రస్తుతం నగర శివార్లలోని ఓ క్వారీలో వేసిన పెద్ద గూడెం సెట్ లో ప్రభాస్, అనుష్కలపై కీలక సన్నివేశాలను చిత్రీకరిస్తున్నారు. దేవసేన అయిన అనుష్క గర్భవతి కావడంతో అమరేంద్ర బాహుబలి ఆమెకు సేవలు చేస్తున్నాడు.
వేల మందితో సేవలు పొందాల్సిన రాజు గుడిసెలో సామాన్యుడిగా జీవిస్తుండడం గూడెం ప్రజల హృదయాలను పిండేస్తోంది. ఎంతో ఎమోషన్ తో సాగే ఈ సీన్లను దర్శకధీరుడు ఎస్.ఎస్.రాజమౌళి తన మార్క్ తో చిత్రీకరిస్తున్నారు. నిండు గర్భిణిగా అనుష్క నటన అద్భుతమని చిత్ర బృందం వెల్లడించింది. దేవసేన శివుడు (మహేంద్ర బాహుబలి)కి ఈ గూడెంలోనే జన్మనివ్వనుంది. మరో రెండు రోజుల్లో ఆ సన్నివేశాల్ని కూడా షూట్ చేయనున్నారు. బాహుబలి బిగినింగ్ లో డీ గ్లామర్ గా కనిపించిన స్వీటీ ఇందులో అపర సౌందర్య రాశిగా కనువిందు చేయనుంది. ఇప్పటికే క్లైమాక్స్ ని పూర్తి చేసిన చిత్ర బృందం .. వచ్చేనెలకి షూటింగ్ పార్ట్ కంప్లీట్ చేయనుంది.
