కొరటాల శివ దర్శకత్వంలో సూపర్ స్టార్ మహేష్ బాబు చేస్తున్న ‘భరత్ అనే నేను’ సినిమా ఫస్ట్ ఓత్ జనవరి 26 న రిలీజ్ అయి విశేషంగా ఆకట్టుకుంది. ముఖ్యమంత్రిగా మహేష్ నటిస్తున్న ఈ మూవీ టీజర్ ఉగాదిన రిలీజ్ కానుంది. ఈ చిత్రం ద్వారా బాలీవుడ్ బ్యూటీ కైరా అద్వానీ తెలుగు తెరకు పరిచయం అవుతున్న సంగతి తెలిసిందే. టాలీవుడ్ లో పనిచేయడం తనకి చాలా ఆనందాన్ని ఇచ్చిందని పలు మార్లు చెప్పింది. అలాగే తన తొలి తెలుగు హీరో మహేష్ గురించి ఎంతో గొప్పగా చెప్పింది. రీసెంట్ గా ఓ జాతీయ మీడియాకి ఇచ్చిన ఇంటర్వ్యూలో అనేక ఆసక్తికర విషయాలు వెల్లడించింది. “మహేష్ బాబు సెట్స్ లో ఒక సూపర్ స్టార్ లా కాకుండా చాలా సింపుల్ గా ఉంటారు. నేను తెలుగు డైలాగ్స్ నేర్చుకునే వరకు చాలా ఓపిగ్గా ఎదురుచూస్తారు.
అతన్ని ఎప్పుడు కలిసినా సినిమా విషయాలు తప్ప ఇంకేమీ మాట్లాడరు, ఆయనకెప్పుడూ సినిమాల ధ్యాసే” అని కైరా తెలిపింది. మార్చి లో “భరత్ అనే నేను” చివరి షెడ్యూల్ జరగనుంది. దీంతో ప్రొడక్షన్ వర్క్ కంప్లీట్ కానుంది. పోస్ట్ ప్రొడక్షన్ పనుల్లో వేగం పెంచి.. ఏప్రిల్ 20న సినిమా రిలీజ్ చేయడానికి చిత్ర బృందం శ్రమిస్తోంది. ప్రముఖ నిర్మాత డి.వి.వి. దానయ్య నిర్మిస్తున్న ఈ సినిమాకి రాక్ స్టార్ దేవీ శ్రీ ప్రసాద్ సంగీతం అందిస్తున్నారు. ఇండస్ట్రీ హిట్ శ్రీమంతుడు కాంబినేషన్లో వస్తున్న ఈ మూవీపై భారీ అంచనాలున్నాయి.
