ఈ అక్టోబర్ 9న ‘ఆదర్శ కుటుంబం’ సినిమా రిలీజ్ కావాల్సి ఉంది. కానీ కొన్ని కారణాల వల్ల అది వాయిదా పడింది. దీంతో అదే రోజు రిలీజ్ అవుతున్న ‘కామ్రేడ్ కళ్యాణ్’ సినిమా ఆడియన్స్‌కి ఫస్ట్ ఛాయిస్ అయిపోయింది. శ్రీవిష్ణు హీరోగా తెరకెక్కిన సినిమా ఇది. కోన వెంకట్ సమర్పణలో రూపొందింది. జానకి ఈ సినిమాతో దర్శకుడిగా పరిచయం అవుతున్నాడు.
ఈ విషయాలు పక్కన పెడితే.. ‘కామ్రేడ్ కళ్యాణ్’ అనేది నక్సలిజం బ్యాక్‌డ్రాప్‌లో రూపొందిన సినిమా. టాలీవుడ్‌లో ఇప్పటివరకు నక్సలిజం బ్యాక్‌డ్రాప్‌లో వచ్చిన సినిమాలు క్రిటికల్‌గా పాజిటివ్ రెస్పాన్స్ తెచ్చుకున్నప్పటికీ, బాక్సాఫీస్ వద్ద మాత్రం పాజిటివ్ రిజల్ట్‌ను అందుకోలేకపోయాయి. ఈ విషయంపై రైటర్ కోన వెంకట్‌ను ప్రశ్నించగా.. ఆయన ఈ విధంగా స్పందించారు. “నక్సలిజం బ్యాక్‌డ్రాప్‌లో సింధూరం, విరాటపర్వం వంటి సినిమాలు వచ్చాయి. అయితే కామెడీని మిక్స్ చేస్తూ ఏ సినిమా రాలేదు. ఆ విధంగా చూసుకుంటే ‘కామ్రేడ్ కళ్యాణ్’ ఆ సెంటిమెంట్‌ను బ్రేక్ చేస్తుంది” అంటూ చెప్పుకొచ్చారు.
కోన వెంకట్ స్పందనతో ఇది ఒక్కసారిగా హాట్ టాపిక్ అయ్యింది. ఎందుకంటే.. నక్సలిజం అనేది చాలా సెన్సిటివ్ అండ్ సీరియస్ ఇష్యూ. పవన్ కళ్యాణ్ ‘జల్సా’ సినిమాలో కూడా నక్సలిజం బ్యాక్‌డ్రాప్‌ను కామెడీగా చూపించారు. దానిపై ఆ రోజుల్లో గట్టిగానే విమర్శలు వచ్చాయి. అలాంటిది ‘కామ్రేడ్ కళ్యాణ్’ సినిమాను ఫుల్ లెంగ్త్ కామెడీ ఎంటర్టైనర్‌గా తీశారు. అలాంటప్పుడు ఈ సినిమాపై ఏ రేంజ్‌లో విమర్శలు వస్తాయోననే చర్చ జరుగుతోంది. ఒక సీరియస్ ఇష్యూలో కామెడీని చూపించడం వరకు ఓకే కానీ, కామెడీతోనే నక్సలిజం బ్యాక్‌డ్రాప్‌లో సినిమాలు తీస్తే వర్కౌట్ అవుతాయంటూ కోన వెంకట్ లాంటి సీనియర్ అండ్ స్టార్ రైటర్ స్టేట్‌మెంట్ ఇవ్వడం ఎంతవరకు కరెక్ట్ అనేది చాలా మంది అభిప్రాయం.
