కొరటాల, విజయ్ దేవరకొండ కాంబినేషన్లో సినిమా రానుందా?

స్టార్ డైరక్టర్స్ సైతం డేట్స్ కావాలని కోరుకుంటున్న హీరోల్లో విజయ్ దేవరకొండ ఒకరు. పెళ్లిచూపులు సినిమా హీరోగా పరిచయమైన ఇతను.. సందీప్ రెడ్డి వంగా దర్శకత్వంలో వచ్చిన అర్జున్ రెడ్డి మూవీతో స్టార్ హీరో అయిపోయారు. రీసెంట్ గా పరుశురామ్ దర్శకత్వంలో నటించిన గీత గోవిందం కూడా బ్లాక్ బస్టర్ హిట్ అయింది. ఈ సినిమాతో విజయ్ రేంజ్ మారిపోయింది. అందుకే అతనికోసం డైరక్టర్స్ క్యూలో ఉన్నారు. వారిలో వరుసగా భారీ హిట్స్ అందుకున్న కొరటాల ఉండడం విశేషం. ఈ విషయాన్ని స్వయంగా కొరటాల చెప్పారు. విజయ్ తాజాగా ఆనంద్ శంకర్ దర్శకత్వంలో “నోటా” అనే ద్వి భాష చిత్రాన్ని చేశారు. నాజ‌ర్, స‌త్య‌రాజ్ కీల‌క‌పాత్ర‌లు పోషించిన ఇందులో మెహ్రీన్ జ‌ర్న‌లిస్ట్ పాత్ర‌లో నటించింది. ఏకకాలంలో తెలుగు, తమిళ భాషల్లో జ్ఞానవేల్ రాజా స్టూడియో గ్రీన్ ప‌తాకంపై నిర్మించిన ఈ సినిమా ఈనెల 5 న రిలీజ్ కానుంది.

ఈ చిత్ర ప్రీ రిలీజ్ ఈవెంట్ కి హాజరైన కొరటాల అనేక ఆసక్తికర విషయాలు చెప్పారు. “పెళ్లి చూపులు’ సినిమా వచ్చినప్పటి నుంచి విజయ్ దేవరకొండ కోసం కథను రెడీ చేయాలనుకుంటున్నాను. కానీ ఆయన విభిన్నమైన కథా చిత్రాలను చేస్తూ ఏ తరహా కథను సిద్ధం చేయాలనే విషయంలో నన్ను కన్ఫ్యూజ్ చేస్తున్నాడు. మంచి స్క్రిప్ట్ తో త్వరలోనే విజయ్ దేవరకొండను కలుస్తాను” అని చెప్పారు. భరత్ అనే నేను సినిమా తర్వాత చిరంజీవితో కొరటాల మూవీ చేయనున్నారు. ప్రస్తుతం ఆ పనుల్లోనే ఉన్నారు. దీని తర్వాత విజయ్ దేవరకొండ తో మూవీ ఉండొచ్చని తెలుస్తోంది.