మహేష్ బాబు ప్రస్తుతం ‘మహర్షి’ చిత్ర షూటింగ్ లో బిజీగా ఉన్నాడు. ఇది మహేష్ బాబు కు 25 వ చిత్రం. ఇక 26 వ సినిమాని సుకుమార్ డైరెక్షన్లో అలాగే 27 వ చిత్రాన్ని ‘అర్జున్ రెడ్డి’ ఫేమ్ సందీప్ రెడ్డి వంగా డైరెక్షన్లో చేయబోతున్నాడంటూ ప్రచారం జరుగుతున్న సంగతి తెలిసిందే. సందీప్ రెడ్డి వంగా తో చేయబోయే చిత్రాన్ని గీతా ఆర్ట్స్ బ్యానర్ పై అల్లు అరవింద్ నిర్మించబోతున్నారని కూడా వార్తలు వచ్చాయి. మహేష్ బాబు తో ఓ సినిమా చేయాలనీ అల్లు అరవింద్.. ఎప్పటినుండో ప్రయత్నిస్తున్నాడట.
అయితే సందీప్ చెప్పిన కథలో మహేష్ కొన్ని మార్పులు చెప్పినట్టు సమాచారం. ప్రస్తుతం సందీప్ ‘అర్జున్ రెడ్డి’ హిందీ రీమేక్ ‘కభీర్ సింగ్’ షూటింగ్ లో బిజీగా ఉంటూనే.. మహేష్ తో చేయబోయే చిత్ర కథను డెవలప్ చేస్తున్నాడంట. దీనికి సంబందించిన వివరాలను నిర్మాత అల్లు అరవింద్ ఎప్పటికప్పుడు తెలుసుకుంటున్నాడట. ఇక ఈ కథ ఫైనలైజ్ అయిన వెంటనే సెట్స్ పైకి తీసుకువెళ్ళాలని అల్లు అరవింద్ భావిస్తున్నట్టు తెలుస్తోంది. ఒక వేళ ఈ కథ మహేష్ కు నచ్చి ఓకే చెబితే గీతా ఆర్ట్స్ లో మహేష్ చిత్రం దాదాపు ఖాయమైనట్టే అనడంలో సందేహం లేదు.
