సూపర్ స్టార్ మహేష్ బాబు, కొరటాల శివ క్రేజీ కాంబినేషన్లో వచ్చిన భరత్ అనే నేను ఏప్రిల్ 20 న రిలీజ్ అయి బ్లాక్ బస్టర్ హిట్ సొంతం చేసుకుంది. బాలీవుడ్ బ్యూటీ కైరా అద్వానీ హీరోయిన్ గా నటించిన ఈ మూవీ విడుదలయిన అన్ని థియేటర్లలో హౌస్ ఫుల్ కలక్షన్స్ రాబడుతోంది. తెలుగు రాష్ట్రాల్లోనే కాకుండా ప్రపంచవ్యాప్తంగా భారీ వసూళ్లు సాధిస్తోంది. రెండు వారాలకే 200 కోట్ల గ్రాస్ సొంతంచేసుకున్న ఈ సినిమా చెన్నైలోను మంచి కలక్షన్స్ అందుకుంది. ఈ రెస్పాన్స్ చూసి ఈ చిత్రాన్ని తమిళంలో డబ్ చేయాలనీ నిర్ణయించుకున్నారు. మహేష్ బాబు కి తమిళనాడులోనూ అభిమానులు ఉన్నారు.
ఆయన గత చిత్రాలు తమిళంలో అనువాదమై మంచి కలక్షన్స్ రాబట్టాయి. అంతేకాకుండా స్పైడర్ సినిమా ద్వారా నేరుగా మహేష్ అడుగుపెట్టారు. ఆ చిత్రం విజయం సాధించకపోయినప్పటికీ అక్కడి సినీ ప్రేక్షకులకు మహేష్ బాబు అంటే తెలుసు. అందుకే తెలుగులో ఘనవిజయం సాధించిన భరత్ అనే నేను సినిమాని తమిళంలో త్వరలో రిలీజ్ చేయనున్నారు. ఇప్పటికే డబ్బింగ్ పనులు మొదలయ్యాయి. స్పైడర్ కి మాదిరిగానే ఇందుకు సొంతంగా మహేష్ డబ్బింగ్ చెప్పనున్నారు. నిర్మాత డివివి.దానయ్య తమిళ వెర్షన్ ని కూడా గ్రాండ్ గా రిలీజ్ చేయాలనీ సన్నాహాలు చేస్తున్నారు.
