సూపర్ స్టార్ మహేష్ బాబు, కమర్షియల్ డైరక్టర్ మురుగదాస్ కాంబినేషన్లో వస్తున్న సినిమా వేగంగా చిత్రీకరణ జరుపుకుంటోంది. గత వారం రోజులుగా హైదరాబాద్ లోని బిజీ రోడ్లపై మూడో షెడ్యూల్ ఛేజింగ్ సీన్ షూటింగ్ చేస్తున్నారు. 100 కోట్ల బడ్జెట్ తో ఏక కాలంలో తెలుగు, తమిళ భాషల్లో తెరకెక్కుతున్న ఈ మూవీలో సూపర్ స్టార్ ఇన్వెస్ట్ గేషన్ ఆఫీసర్ గా నటిస్తున్నారు.
స్పెషల్ పోలీస్ గా ప్రిన్స్ లుక్ ని చూడాలని అభిమానులు ఆసక్తిగా ఎదురుచూస్తున్నారు. వారి కోరిక ఈ నెలలో తీరనుంది. సూపర్ స్టార్ సరసన ఫిట్ బ్యూటీ రకుల్ ప్రీత్ సింగ్ నటిస్తున్న ఈ సినిమా ఫస్ట్ లుక్ ని దీపావళికి రిలీజ్ చేయాలనీ మురుగదాస్ ఫిక్స్ అయ్యారు. ఫస్ట్ లుక్ రిలీజ్ పోస్ట్ పోన్ అయిందని కొన్ని రోజులుగా వస్తున్న వార్తలను చిత్ర బృందం ఖండించింది. తమిళం, తెలుగు రెండు పోస్టర్ లను దీపావళి కి రిలీజ్ చేస్తామని స్పష్టం చేసింది. ఏప్రిల్ లో ఈ చిత్రం థియేటర్లలో సందడి చేయనుంది.
