డైలాగ్ కింగ్ మంచు మోహన్ బాబు.. చిన్న తనయుడు మంచు మనోజ్ ఈ మధ్య సినిమాలకు దూరంగా ఉన్నప్పటికీ సోషల్ మీడియాలో మాత్రం అందరికీ అందుబాటులో ఉన్నారు. సమాజంలో జరిగే ముఖ్యమైన సంఘటనలపై స్పందిస్తున్నారు. హరికృష్ణ అంత్యక్రియలప్పుడు ఎన్టీఆర్ కి అండగా నిలవడం, ప్రణయ్ హత్యను ఖండించడం.. ఫసక్ ట్రెండ్ ని స్వాగతించడం.. వంటి అంశాల వల్ల కొన్ని రోజులుగా నిత్యం ట్రెండింగ్ లో ఉంటున్నారు. తాజాగా దేవదాస్ సినిమాకి అండగా నిలిచి సినీ ప్రియుల మనసు గెలుచుకున్నారు. నాగార్జున, నాని కలిసి నటించిన మూవీ దేవదాస్. శ్రీరామ్ ఆదిత్య దర్శకత్వంలో తెరకెక్కిన ఈ మూవీ నేడు రిలీజ్ అయి మిశ్రమ స్పందన అందుకుంది. అయితే నాని, కౌశల్ అభిమానుల మధ్య జరుగుతున్న కోల్డ్ వార్ కారణంగా కొంతమంది ఈ సినిమాని చూడవద్దని ప్రచారం చేస్తున్నారు.
వ్యక్తిగత కారణాల వల్ల ఎంతోమంది శ్రమించి తీసిన సినిమాను పక్కన పెట్టమని చెప్పడం మంచిది కాదని మంచు మనోజ్ ట్విట్టర్ వేదికపై తన అభిప్రాయాన్ని వ్యక్తం చేశారు. ” సినిమా ఒకరిది కాదు తమ్ముడు.ఎంతోమంది ఆకలి కష్టం. ఎన్నో డిపార్ట్ మెంట్లు రాత్రి పగలు ఫ్యామిలీస్ ని వదిలి పనిచేస్తారు. అన్ని విమర్శలను వదిలి సినిమాని ఎంజాయ్ చేద్దాం. వారి శ్రమని గౌరవిద్దాం” అని ట్వీట్ చేశారు. ఈ ట్వీట్ అందరికీ ఆకట్టుకుంది. ముఖ్యంగా సినీ ప్రేమికులందరూ మంచు మనోజ్ చెప్పిన మాటల్లో నిజముందని ఒప్పుకుంటున్నారు. అతన్ని అభినందిస్తున్నారు.
