వినాయకచవితి సందర్భంగా ఈనెల 13 న నాగచైతన్య నటించిన “శైలజా రెడ్డి అల్లుడు”, సమంత మూవీ “యూటర్న్” రిలీజ్ అవుతున్నాయి. భార్య భర్తలు ఒకే రోజున థియేటర్లో పోటీ పడుతున్నారు. ఈ పోటీ గురించి సమంతని అడిగితే.. “మేము పోటీ పడడం లేదు. కలిసి వస్తున్నాము” అంటూ తెలివిగా సమాధానం చెప్పింది. ఈ విషయంపై ఓ ఇంటర్వ్యూలో నాగచైతన్యని ప్రశ్నించగా ఆసక్తికర సమాధానం ఇచ్చారు. “అక్కినేని అభిమానులకు మీరిద్దరూ సమానం.. మరి ఇద్దరిలో ఎవరి సినిమాని ముందు చూడాలి ?” అని అడగగా ఇలా సమాధానం ఇచ్చారు. “నా సినిమానే ముందు చూడండి.
ఎందుకంటే సమంతకి ఈ ఏడాదిలో భారీ హిట్స్ ఉన్నాయి. రంగస్థలం, మహానటి వంటి సినిమాలతో ప్రేక్షకుల ముందుకు వచ్చింది. నేను ఈ ఏడాది ఈ సినిమాతోనే వస్తున్నా. కాబట్టి నా సినిమానే ఫస్ట్ చూడండి” అంటూ నవ్వుతూ చెప్పారు. ఇంకా మాట్లాడుతూ “నా సినిమాని సమంత చూసింది. ఆమెకి బాగా నచ్చింది. నేను యు టర్న్ చూసాను. బాగా వచ్చింది. రెండు సినిమాల్లో ఆఖరి 40 నిముషాలు చాలా బాగుంటుంది. పండుగ ఫీలింగ్ నా సినిమాలో ఎక్కువగా కనిపిస్తుంది. అత్త, కూతురు, అల్లుడి మధ్య డ్రామా మంచి అనుభూతిని ఇస్తుంది” అని చైతూ వివరించారు. ఏదేమైనా రెండు సినిమాలు హిట్ అవ్వాలని ప్రతి అక్కినేని అభిమాని కోరుకుంటున్నారు.
