ప్రస్తుతం తెలుగు చిత్ర పరిశ్రమలో బయోపిక్ ల హవా నడుస్తోంది. మహానుభావుల జీవిత కథలు కాసులు కూడా కురిపిస్తుండడంతో భారీ బడ్జెట్ తో నిర్మించడానికి ముందుకు వస్తున్నారు. అలనాటి అభినేత్రి సావిత్రి జీవితంలోని మధుర ఘటనలను నాగ్ అశ్విన్ మహానటి పేరుతో వెండితెరపై ఆవిష్కరిస్తున్నారు. ఈ మూవీ వచ్చే నెల 9 న రిలీజ్ కాబోతోంది. అలనాటి మహానటుడు నమదమూరి తారకరామారావు బయోపిక్ కూడా సెట్స్ పై ఉంది. ఎన్టీఆర్ తనయుడు బాలకృష్ణ తానే ఎన్టీఆర్ గా నటిస్తూ.. ఈ చిత్రాన్ని నిర్మిస్తున్నారు. ఒక్కొక్క సీన్ కోసం, పాత్ర కోసం లక్షలు ఖర్చుపెడుతున్నట్టు సమాచారం. ఇందులో ఎన్టీఆర్ కుటుంబసభ్యులు అనేకమంది నటిస్తున్నారు. ఇక మరో గొప్పనటుడు, చివరి వరకు సినిమానే శ్వాసగా బతికిన అక్కినేని నాగేశ్వరరావు జీవితం కూడా సినిమాగా రూపుదిద్దుకోనుంది.
అందుకు తగిన ప్రీ ప్రొడక్షన్ పనులు జోరుగా సాగుతున్నాయి. అన్నపూర్ణ స్టూడియో బ్యానర్లోనే నాగ్ ఈ చిత్రాన్ని నిర్మించనున్నారు. ఈ బయోపిక్ లో టీనేజ్ ఏఎన్నార్ గా నాగచైతన్య, స్టార్ హీరోగా స్థాయిలో నాగార్జున నటించనున్నట్లు ఫిలిం నగర్ వాసులు చెప్పారు. ప్రస్తుతం చైతూ సవ్యసాచి, శైలజా రెడ్డి సినిమాలు చేస్తున్నారు. నాగ్ ఆఫీసర్ మూవీ తర్వాత నాని తో కలిసి మల్టీస్టారర్ మూవీ చేస్తున్నారు. ఇవి కంప్లీట్ అయిన తర్వాత ఏఎన్నార్ బయోపిక్ పట్టాలెక్కే ఆస్కారం ఉంది.
