యువ నటుడు నాగశౌర్య చేసిన మొదటి రెండు చిత్రాలు విజయం సాధించకపోయినప్పటికీ “ఊహ‌లు గుస‌గుస‌లాడే” సినిమాతో హీరోగా మంచి పేరు తెచ్చుకున్నారు. ఆ తర్వాత దిక్కులు చూడకు రామయ్య, జోఅచ్యుతానంద చిత్రాలతో మంచి విజయాలు అందుకున్నారు. సొంత బ్యానర్లో చేసిన “ఛ‌లో” సినిమాతో సూపర్ హిట్ ని కైవశం చేసుకున్నారు. అయితే ఆ చిత్రం తర్వాత వచ్చిన మూడు సినిమాలు ఆకట్టుకోలేకపోయాయి. మంచి కాన్సెప్ట్స్ తో వచ్చిన “క‌ణం”, “అమ్మ‌మ్మ‌గారిల్లు”, “@న‌ర్త‌న‌శాల” సినిమాలు ఎంటర్టైన్మెంట్ చేయలేకపోయాయి. ప్ర‌స్తుతం నాగశౌర్య కొత్త ద‌ర్శ‌కుడు రాజా కొల‌స‌తో ఓ సినిమా చేస్తున్నారు.
జ‌గ‌ప‌తిబాబు హీరోగా వచ్చిన “ఆయ‌న‌కిద్ద‌రు” సినిమాకి ఇది రీమేక్ అని టాక్. ఇద్ద‌రు భామ‌ల మ‌ధ్య న‌లిగిపోయే ప్రియుడిగా నాగశౌర్య కనిపించనున్నారు. ఈ చిత్రాన్ని భ‌వ్య క్రియేష‌న్స్ బ్యాన‌ర్‌పై ఆనంద్ ప్ర‌సాద్ నిర్మిస్తున్నారు. ఈ సినిమా తర్వాత ర‌మ‌ణ తేజ అనే మ‌రో కొత్త ద‌ర్శ‌కుడితో సినిమా చేయడానికి సన్నాహాలు జరుగుతున్నాయి. అంతకంటే ముందుగానే మంచి ఛాన్స్ అందుకున్నారు. గీతా ఆర్ట్స్ సంస్థ నిర్మాణంలో ఓ సినిమా చేయనున్నారు. “గీత‌గోవిందం” సినిమాతో విజ‌యాన్ని అందుకున్న నిర్మాత బ‌న్నీ వాసు ఈ సినిమాను నిర్మించ‌బోతున్నారు. డైరక్టర్ పేరు.. ఇతర వివరాలు త్వరలోనే అధికారికంగా ప్రకటించనున్నారు.
