వేసవిలో ఎండల వేడి కన్నా సినిమాల మధ్య పోటీ సెగ ఎక్కువగా ఉండనుంది. ఈ సీజన్ లో దాదాపు 12 సినిమాలు థియేటర్లో హంగామా చేయనున్నాయి. వాటిలో రామ్ చరణ్ రంగస్థలం, మహేష్ బాబు భరత్ అను నేను, అల్లు అర్జున్ నా పేరు సూర్య సినిమాలపై భారీ అంచనాలు ఉన్నాయి. ఎవరున్నా బరిలోకి దిగుతానని నాని స్పష్టం చేశారు. ప్రస్తుతం నాని యువ దర్శకుడు మేర్లపాక గాంధీ దర్శకత్వంలో “కృష్ణార్జున యుద్ధం” సినిమా చేస్తున్నారు. నాని ద్విపాత్రాభినయం చేస్తున్న ఈ చిత్రంపై పాజిటివ్ టాక్ ఉంది. ఈ మూవీ ఏప్రిల్ 13 న రిలీజ్ కానుంది. దీనికి రెండు వారాల ముందు అంటే మార్చి 30 న రంగస్థలం విడుదల కానుంది. సుకుమార్ దర్శకత్వంలో చెర్రీ తొలిసారి నటించడం.. చరణ్ జోడీగా సమంత కనిపించడం.. పాతికేళ్ళనాటి కథ కావడం.. వంటి అంశాలు ఈ సినిమాపై ఆసక్తిని పెంచుతున్నాయి.
పైగా టీజర్లు సినిమాని ఎప్పుడెప్పుడు చూడాలనే ఆత్రుతని పెంచాయి. ఇక “కృష్ణార్జున యుద్ధం” రిలీజ్ అయిన వారం రోజులకే అంటే ఏప్రిల్ 20 న భరత్ అనే నేను థియేటర్లోకి రానుంది. శ్రీమంతుడు కాంబినేషన్.. మహేష్ తొలి సారి ముఖ్యమంత్రిగా కనిపించనుండడం వంటి అంశాలు ఈ చిత్రానికి క్రేజ్ ని తీసుకొచ్చాయి. మరి ఈ రెండు చిత్రాల మధ్య లో రావడమంటే ఎంతో సాహసంతో కూడుకుంది. అయినా భయపడకుండా నాని యుద్ధం ప్రకటించేశాడు. మరి ఈ ముక్కోణపు యుద్ధంలో గెలుపెవరిదో ప్రేక్షకులు నిర్ణయించనున్నారు.
