ఇంద్రగంటి మోహనకృష్ణ దర్శకత్వం వహించిన ‘జెంటిల్ మన్’ నాని కెరీర్ లో మరో సూపర్ హిట్ గా నిలిచింది. ఈ సినిమాలో నాని రెండు పాత్రల్లో కనపడగా అందులో ఓ పాత్రకు జోడీగా నివేద థామస్ నటించిన సంగతి తెలిసిందే. తొలి సినిమాతోనే తెలుగు వారి దృష్టిని ఆకర్షించింది ఈ మలయాళీ ముద్దుగుమ్మ. బాలనటి అయిన నివేద నటనకు నాని సహా కమల్ వంటి ప్రముఖులు ప్రశంసించారు. అటు నివేద కూడా కమల్ హాసన్ తర్వాత నా అభిమాన నటుడు నాని అని చెప్పుకొచ్చింది. అలాంటిది ఇప్పుడు వీరిద్దరూ మరోసారి జంట కట్టనుండటం విశేషం.
నాని హీరోగా డివివి దానయ్య ఓ సినిమాని నిర్మించనున్నారు. ఈ సినిమాతో శివ శంకర్ దర్శకుడిగా పరిచయం కానున్నారు. ఈ సినిమాలో నాని సరసన హీరోయిన్ గా నివేద థామస్ ను ఎంపిక చేశారట. దీంతో నాని-నివేద హిట్ పెయిర్ జాబితాకెక్కారు. ప్రస్తుతం త్రినాధరావు తెరకెక్కిస్తున్న ‘నేను లోకల్’ సినిమాలో నటిస్తున్న నాని దానయ్య నిర్మించనున్న సినిమాని వచ్చే ఏడాది సెట్స్ పైకి తీసుకెళ్లనున్నారు. ఇది పూర్తవగానే అవసరాల శ్రీనివాస్ సినిమా మొదలవనుంది.
