యువ హీరో నితిన్ ‘లై’ సినిమాతో ఫ్లాప్ ని అందుకున్నారు. వరుసగా అపజయాలతో సతమతమైన ఈ హీరో ఇష్క్ తో హిట్ ట్రాక్ లోకి వచ్చారు. అప్పటి నుంచి విజయాల జోరు కొనసాగించారు. లై వద్ద వెనక్కి తగ్గారు. ఈ సినిమా తర్వాత ఎలాగైనా హిట్ కొట్టాలని, తనకి తొలి హిట్ ఇచ్చిన దిల్ రాజు నిర్మాణంలో సినిమా చేయడానికి గ్రీన్ సిగ్నల్ ఇచ్చారు. “మళ్ళీ 14 ఏళ్ళ తర్వాత దిల్ రాజు నిర్మాణంలో శ్రీనివాస్ కళ్యాణం సినిమా చేస్తున్నందుకు చాలా సంతోషంగా ఉంది.
సతీష్ వేగేశ్న దర్శకత్వంలో తెరకెక్కుతున్న ఈ సినిమాకి మిక్కీ జె మేయర్ సంగీతాన్ని అందిస్తున్నారు. ఈ ప్రాజెక్ట్ మార్చిలో మొదలవుతుంది” అని నితిన్ ట్విట్టర్ లో తెలిపారు. దీంతో అందరూ శుభాకాంక్షలు చెబుతుంటే.. ఫ్యాషన్ డిజైనర్, స్టైలిష్ నీరజ నితిన్ కి షాక్ ఇచ్చింది. శ్రీనివాస కల్యాణం.. సరే నీ పెళ్ళెప్పుడు బాబూ అని ప్రశ్నించింది. “ఆల్ ది బెస్ట్ హీరో.. `శ్రీనివాస కల్యాణం` గురించి విన్న తర్వాత అందరూ ఇక నీ కల్యాణం గురించే అడుగుతారు” అని ట్వీట్ చేసింది. ప్రస్తుతం నితిన్ వయసు 34. తెలుగు చిత్ర పరిశ్రమలోని సీనియర్ బ్యాచిలర్స్ లో నితిన్ ఒకరు. ఎన్నో సార్లు పెళ్లి ప్రశ్నలను ఎదుర్కొన్నారు. శ్రీనివాస్ కళ్యాణం సినిమాతో మరింత మంది ప్రశ్నించడం గ్యారంటీ. మరి వారందరికీ నితిన్ ఎలా సమాధానం చెబుతాడో చూడాలి.
