ఒక సినిమా హిట్ అయినప్పుడు సదరు సినిమాలో హీరోహీరోయిన్లను లేదా చిత్రాన్ని తెరకెక్కించిన దర్శకుడ్ని అభినందించడం అనేది ఎప్పుడూ జరిగేదే. అయితే.. ఒక స్టార్ హీరోని మరొక స్టార్ హీరో సినిమాకి శుభాకాంక్షలు చెప్పడం, ముఖ్యంగా సదరు స్టార్ హీరో పెర్ఫార్మెన్స్ బాగుందని చెప్పడం అనేది చాలా అరుదుగా జరుగుతుంటుంది. కానీ.. మొట్టమొదటిసారిగా రామ్ చరణ్ కథానాయకుడిగా నటించిన “రంగస్థలం” సినిమాపై ఎన్టీఆర్ ప్రశంసల వర్షం కురిపించాడు. దర్శకుడిని, కథానాయికను చాలా బాగా చేశారు అని అభినందించిన తారక్.. రామ్ చరణ్ ని ప్రత్యేకంగా “నీకంటే బెటర్ గా ఆ రోల్ ఎవరూ చేయలేరేమో చరణ్” అని ప్రశంసించడం మెగా అభిమానులను ఆశ్చర్యంతోపాటు ఆనందంతో ముంచెత్తింది.
మళ్ళీ చరణ్ ఎన్టీయార్ కి “థ్యాంక్స్ బ్రదర్” అని చెప్పడం నందమూరి అభిమానులని కూడా సంతుష్టులను చేసింది. ఇద్దరూ కలిసి ఒక సినిమాలో నటించబోతున్న విషయం తెలిసిందే అయినా.. సినిమా మొదలవ్వడానికి ముందే ఈ ఇద్దరూ ఈ విధంగా స్నేహపూర్వకంగా మెలగడం అనేది స్వాగతించదగ్గ విషయం. ఇంతకుమునుపు ఎన్టీయార్ “బాద్ షా” చిత్రానికి రామ్ చరణ్ క్లాప్ కొట్టడాన్ని కూడా ఈ సందర్భంగా ఇరు వర్గాల అభిమానులు గుర్తు చేసుకొంటుండడం విశేషం.
