బాహుబలి సినిమాల తర్వాత రాజమౌళి చేస్తున్న సినిమా ప్రకటనతోనే క్రేజ్ సంపాదించుకుంది. ఆయన తొలి సారి మల్టీ స్టారర్ మూవీ చేయడం.. అది కూడా నందమూరి, మెగా హీరోలు కలిసి నటిస్తుండడం ఆ క్రేజ్ కి ప్రధాన కారణాలు. డీవీవీ దానయ్య నిర్మిస్తున్న ఈ చిత్రం కోసం నగర శివార్లలో భారీ సెట్స్ వేస్తున్నారు. రెండేళ్ల పాటు ఆ స్థలాన్ని లీజ్ కి తీసుకున్నట్టు తెలిసింది. అంటే సినిమా రెండేళ్లపాటు చిత్రీకరణ జరుపుకోవడం ఖాయమని తెలుస్తోంది. మరి అటువంటి సినిమా ఎప్పుడు మొదలవుతుంది?. ఫిలిం నగరవాసుల సమాచారం మేరకు నవంబర్ నుంచి సెట్స్ మీదకు వెళ్లనుంది. మొదట ఎన్టీఆర్ పైనే సన్నివేశాన్ని చిత్రీకరించనున్నట్టు టాక్. ఎందుకంటే ప్రస్తుతం ఎన్టీఆర్… త్రివిక్రమ్ దర్శకత్వం లో అరవింద సమేత వీర రాఘవ సినిమా చేస్తున్నారు.
ఈ మూవీని వేగంగా పూర్తి చేసి అక్టోబర్ 10 న రిలీజ్ చేయనున్నారు. అంటే అక్టోబర్ చివరి నాటికీ ఈ సినిమా కార్యక్రమాలు అన్ని పూర్తి అయిపోతాయి. సో నవంబర్ నుంచి రాజమౌళికి ఎన్టీఆర్ సరెండర్ అవుతారు. రామ్ చరణ్ మాత్రం కాస్త ఆలస్యంగా అంటే జనవరి నుంచి షూటింగ్ లో జాయిన్ అవుతారు. బోయపాటి శీను దర్శకత్వం లో రామ్ చరణ్ చేస్తున్న సినిమా షూటింగ్ నవంబర్ వరకు సాగుతుంది. ఆ తర్వాత డబ్బింగ్, ప్రమోషన్ కార్యక్రమాలతో బిజీగా ఉంటారు. ఆ సినిమా ఫీవర్ నుంచి సంక్రాంతి పండుగ తర్వాతే బయటికి వస్తారు. అందుకే సమయం వృధా కాకుండా ఎన్టీఆర్ సోలో సీన్స్ ముందు తీసేసి.. కాంబినేషన్ సీన్స్ ఫిబ్రవరి నుంచి షూట్ చేయనున్నారు.
