దసరా (అక్టోబర్ 19 ) సందర్భంగా రిలీజ్ కావడానికి అనేక సినిమాలు ముస్తాబు అవుతున్నాయి. త్రివిక్రమ్ శ్రీనివాస్ దర్శకత్వంలో ఎన్టీఆర్ నటిస్తున్న అరవింద సమేత వీర రాఘవ మూవీ దసరాకి థియేటర్లోకి వస్తుందని చెబుతున్నారే తప్ప అధికారికంగా డేట్ ని ప్రకటించలేదు. అక్టోబర్ 10 న రిలీజ్ అవుతుందని లీకులు మాత్రం వస్తున్నాయి. డేట్ ప్రకటించేస్తే.. అప్పటిలోపున సినిమా పూర్తి అవుతుందా? లేదా? అనే సందేహంతోనే తేదీ ఖరారు చేయడం లేదని తెలిసింది. ఎనర్జటిక్ హీరో రామ్ మాత్రం డేట్ ప్రకటించేశారు. త్రినాథరావు నక్కిన దర్శకత్వంలో తాను చేస్తున్న “హలో గురు ప్రేమకోసమే” మూవీ దసరాకి ఒక్కరోజు ముందు అంటే అక్టోబర్ 18 విడుదలవుతుందని స్పష్టం చేశారు. ఇలా డేట్ ప్రకటించడంలో ఈ చిత్ర నిర్మాత దిల్ రాజు ఆలోచన దాగుందని సమాచారం.
ఇప్పటి నుంచే థియేటర్లను సేకరించే పనిలో పడవచ్చని టాక్. మరి ఎన్టీఆర్ సినిమా ఎప్పుడొస్తుందో అనేది ఆసక్తికరంగా మారింది. ఈ రెండే కాకుండా రవితేజ, శ్రీనువైట్ల కాంబినేషన్లో “అమర్‌ అక్బర్‌ ఆంటోనీ” తెరకెక్కుతోంది. ప్రస్తుతం అమెరికాలో చిత్రీకరణ జరుపుకుంటోంది. ఇది కూడా దసరాకే థియేటర్లో సందడి చేయనుంది. శ్రీరామ్‌ ఆదిత్య దర్శకత్వంలో తెరకెక్కుతోన్న నాగార్జున, నానిల మల్టీస్టారర్‌ మూవీ దసరాకి రానుంది. యువ హీరో శర్వానంద్‌, సాయి పల్లవి జంట గా చేస్తున్న “పడి పడి లేచె మనసు” దసరాకి ప్రేక్షకుల ముందుకు రాబోతోంది. మరి ఈ నాలుగు చిత్రాల దర్శకనిర్మాతలు కూడా విడుదల తేదీలను త్వరలోనే ప్రకటించనున్నారు.
