అప్పటివరకూ అపజయమెరుగని దర్శకుడిగా మంచి క్రేజ్ సంపాదించుకున్నాడు బోయపాటి శ్రీను. ఆయనతో సినిమా చేస్తే మాస్ ఇమేజ్ రావడం ఖాయమని హీరోలు ఈయనతో సినిమాలు చేయడానికి ఎగబడేవారు. కాస్త లేటైనా కానీ ఇప్పటి వరకూ పెద్ద హీరోలతోనే సినిమాలు చేస్తూ వచ్చాడు. కానీ ఒకే ఒక్క చిత్రం దెబ్బకి ఈయన షెడ్డుకెళ్ళిపోయే పరిస్థితి ఏర్పడింది. ఆ చిత్రం మరేదో కాదు రాంచరణ్ తో చేసిన ‘వినయ విధేయరామ’. దాదాపు ఐదు నెలల అజ్ఞాతవాసం చేసి ‘గుణ 369’ ట్రైలర్ లాంచ్ లో దర్శనమిచ్చాడు బోయపాటి.
ఇప్పటి వరకూ ఈయన తరువాతి సినిమా ఏంటనేది అనౌన్స్ చేయలేదు. స్టార్ హీరోలే కాదు.. యువ హీరోలు కూడా బోయపాటి కథ చెప్పడానికి వస్తే మొహం చాటేసేవారని వార్తలొచ్చాయి. అయితే అందుతున్న సమాచారం ప్రకారం.. త్వరలోనే ‘తన బ్యానర్ పై బోయపాటి దర్శకత్వంలో ఓ సినిమా చేస్తానని’ నిర్మాత అల్లు అరవింద్ ఇదివరకే ప్రకటించిన సంగతి తెలిసిందే. అయితే ఈ బోయపాటి డైరెక్షన్లో హీరో ఎవరా? అనేది చర్చనీయాంశం అయ్యింది. ఈ క్రమంలో అల్లు అర్జున్ పేరు ఎక్కువగా వినిపిస్తుంది. దాదాపు ఈ కాంబినేషన్ ఫిక్సని చెబుతున్నారు ఫిలింనగర్ విశ్లేషకులు. గతంలో వీరిద్దరి కాంబినేషన్లో వచ్చిన ‘సరైనోడు’ చిత్రం సూపర్ హిట్ అయ్యింది.
