మాటల మాంత్రికుడు త్రివిక్రమ్ శ్రీనివాస్ దర్శకత్వంలో తొలిసారి ఎన్టీఆర్ నటించనున్న సినిమాకి ప్రీ ప్రొడక్షన్ పనులు వేగంగా సాగుతున్నాయి. తారక్ మాత్రం కొత్త లుక్ లో కనిపించడానికి శ్రమిస్తున్నారు. రెండు రోజుల క్రితం జిమ్ లో సాధన చేస్తున్న ఎన్టీఆర్ ఫోటో బయటికి వచ్చి సంచలనం సృష్టించింది. తారక్ డెడికేషన్ చూసి బాలీవుడ్ హీరోలు సైతం అభినందనలు కురిపించారు. హారిక అండ్ హాసిని బ్యానర్లో రాధాకృష్ణ నిర్మించనున్న ఈ చిత్రంలో తారక్ ఆర్మీ ఆఫీసర్ గా అదరగొట్టనున్నారు. అతనికి జోడీగా డీజీ బ్యూటీ పూజా హెగ్డే నటించనుంది. ఎస్.ఎస్. థమన్ సంగీత దర్శకుడిగా ఖరారు అయిన ఈ సినిమాకి విలన్ కూడా ఫిక్స్ అయ్యారు.
జగపతి బాబుని ప్రతికథానాయకుడిగా త్రివిక్రమ్ ఓకే చేసినట్లు టాలీవుడ్ వర్గాలు తెలిపాయి. సుకుమార్ దర్శకత్వంలో తెరకెక్కిన నాన్నకు ప్రేమతో సినిమాలో జగ్గూభాయ్ ఎన్టీఆర్ కి విలన్ గా నటించారు. వీరిద్దరూ పోటీ పడి నటించి ఆ సినిమాని విజయవంతం చేశారు. మళ్ళీ ఇప్పుడు ఈ కాంబినేషన్ సెట్ అయింది. ఇందులోనూ ఇద్దరూ నటనతో ఆకట్టుకోవడం ఖాయం. అభిమానులను ఊరిస్తున్న ఈ మూవీ వచ్చే నెల నుంచి రెగ్యులర్ షూటింగ్ జరుపుకోనుంది.
