రెండేళ్ల విరామం అనంతరం వెంటనే “రాజా ది గ్రేట్” సినిమాతో సూపర్ హిట్ కొట్టడంతో రవితేజ ఈజ్ బ్యాక్ అనుకొన్నారందరూ. కట్ చేస్తే.. ఆ తర్వాత వచ్చిన “టచ్ చేసి చూడు, నేల టికెట్టు” చిత్రాలు బాక్సాఫీస్ వద్ద బొక్కబోర్లా పడ్డాయి. సినిమాలు ఫ్లాపైన దానికంటే ఎక్కువగా ఆ సినిమాలు కనీస స్థాయి కలెక్షన్స్ రాబట్టకపోవడం పట్ల రవితేజతోపాటు ఆయన అభిమానులు కూడా నిరాశచెందారు. అందుకే.. కాస్త జాగ్రత్త వహించి తనను హీరోగా పరిచయం చేయడంతోపాటు తన కెరీర్ బెస్ట్ హిట్స్ ఇచ్చిన శ్రీనువైట్ల చెప్పిన కథను మెచ్చి మరో అవకాశం ఇచ్చాడు. ఆ సినిమానే “అమర్ అక్బర్ ఆంటోనీ”. అయితే.. ఆ సినిమా ప్రారంభంలో ఉన్నంత ఆసక్తి కానీ క్రేజ్ కానీ ఇప్పుడు లేవు.
పూర్తిస్థాయిలో అమెరికాలో చిత్రీకరించబడ్డ ఈ చిత్రాన్ని తొలుత అక్టోబర్ 5న విడుదల చేద్దామనుకొన్నారు. కానీ.. పోస్ట్ ప్రొడక్షన్ వర్క్ కంప్లీట్ అవ్వకపోవడంతో నవంబర్ లో రిలీజ్ చేద్దామని ప్లాన్ చేసినప్పటికీ.. ఇంకా షూటింగ్ కూడా చాలా పెండింగ్ లో ఉండడంతో ఇప్పుడు డిసెంబర్ 14కి రిలీజ్ డేట్ ఫిక్స్ చేసేపనిలో పడ్డారు. ఆల్రెడీ రెండు సినిమాలు ఫ్లాపవ్వడం.. ఈ కొత్త సినిమా ఇలా పలుమార్లు వాయిదాపడుతుండడం, తదుపరి సినిమా ఏమిటనే విషయంలో ఇంకా క్లారిటీ లేకపోవడంతో రవితేజ అభిమానులందరూ కన్ఫ్యూజన్ లో ఉన్నారు. ఈ సినిమా రిలీజైతే తప్ప రవితేజ ఇప్పట్లో మరో సినిమా అంగీకరించే పరిస్థితి కూడా కనిపించడం లేదు.
