దర్శకధీరుడు ఎస్.ఎస్.రాజమౌళి వెండితెర పై గీసిన కళాఖండం బాహుబలి తెలుగు చిత్రాలను అంతర్జాతీయ స్థాయికి తీసుకెళ్లింది. యంగ్ రెబల్ స్టార్ ప్రభాస్, అనుష్క, తమన్నా, రానా నటించిన ఈ సినిమా గత ఏడాది జులై 10న విడుదలై కలక్షన్ల వర్షం కురిపించింది. ఉత్తమ చిత్రంగా జాతీయ అవార్డుతో పాటు పలు అవార్డులను సొంతం చేసుకుంది. ఇప్పుడు మరో రికార్డును తన ఖాతాలో వేసుకుంది. సోషల్ మీడియాలో తనకు తిరుగు లేదని చాటింది.
బాహుబలి అధికారిక ఫేస్ బుక్ పేజీని ఫాలో అవుతున్న వారి సంఖ్య నేటితో మూడు కోట్లకు దాటింది. ఒక సినిమాకు సంబంధించిన పేజీకి ఇంతమంది ఫ్యాన్స్ ఉండడం ఇదే ప్రథమం. ఈ సందర్బంగా చిత్రబృందం ఫాలోవర్స్ కు కృతజ్ఞతలు తెలిపింది. బాహుబలి కంక్లూజన్ షూటింగ్ విశేషాలు తెలుసుకునేందుకు ఈ పేజీని అనుసరించేవారు రోజురోజుకు పెరుగుతున్నారు. వీరిలో రాజమోళి, ప్రభాస్ ఫ్యాన్స్ తో పాటు బాహుబలి మూవీ ఫ్యాన్స్ ఉన్నారు. ప్రస్తుతం రామోజీ ఫిలిం సిటీలో క్లైమాక్స్ ను చిత్రీకరిస్తున్నారు. 30 కోట్ల వ్యయంతో యుద్ధ సన్నివేశాలను తెరకెక్కిస్తున్నారు. ఈ చిత్రాన్ని వచ్చే ఏడాది ఏప్రిల్ 28న రిలీజ్ చేయనున్నారు.
