మాటల మాంత్రికుడు త్రివిక్రమ్ శ్రీనివాస్, పవర్ స్టార్ పవన్ కళ్యాణ్ తో తొలి సారి జల్సా చిత్రాన్నితెరకెక్కించారు. అప్పటి నుంచి వీరి మధ్య స్నేహం మొదలయింది. జయంత్ సి పరాంజీ, పవన్వ కాంబినేషన్లో వచ్చిన తీన్ మార్ సినిమాకి మాటలు రాయడమే కాదు, కొన్ని సీన్లను త్రివిక్రమ్ డైరక్ట్ చేశారు. ఆ తర్వాత వీరి కలయికలో వచ్చిన అత్తారింటికి దారేది సినిమా టాలీవుడ్ రికార్డులను తిరగరాసింది. దాంతో వీరిద్దరి మధ్య స్నేహం బలపడింది.
పవన్, త్రివిక్రమ్ అభిరుచులు కూడా కలవడం తో ప్రాణ స్నేహితులయ్యారు. వీరి కాంబినేషన్లో మూడో చిత్రానికి హాసిని, హారిక క్రియేషన్ వాళ్లు ముహూర్తం ఫిక్స్ చేశారు. నవంబర్ లో షూటింగ్ ప్రారంభించడానికి నిర్మాత రాధాకృష్ణ ప్రీ పొడక్షన్ పనుల్లో వేగం పెంచారు. ఉన్నట్టుండి వీరి స్టోరీ మలుపు తిరిగింది. పవన్ డేట్స్ కోసం నాలుగు నెలలుగా ఖాళీగా కూర్చున్న మాటల మాంత్రికుడిని పక్కన పెట్టి తమిళ దర్శకుడు నీశన్ డైరెక్షన్లో కొత్త సినిమాకు పవన్ శ్రీకారం చుట్టారు.
దసరా రోజు పూజా కార్యక్రమాలు కూడా పూర్తి చేశారు. త్వరలో సెట్స్ మీదకు తీసుకెళ్లడానికి నిర్మాత ఏ.ఎం.రత్నం ప్రయత్నిస్తున్నారు. మొన్నటి వరకు బెస్ట్ ఫ్రెండ్స్ గా కలిసి తిరిగిన త్రివిక్రమ్, పవన్ మధ్య విభేదాలు రావడానికి కారణం ఏమిటి? మాటల మాంత్రికుడిని పవర్ స్టార్ ఎందుకు పక్కన పెట్టారు? ప్రస్తుతం టాలీవుడ్ సినీ వర్గాలను వేధిస్తున్న ప్రశ్నలు ఇవి. వీటికి వారిద్దరిలో ముందుగా ఎవరు సమాధానం చెబుతారు?
